Lungleiah Lok Kalyan Mela leh PM Awas Mela Shehri buatsaih a ni
Vawiin khan Urban Development & Poverty Alleviation (UD&PA) Department, Lunglei huaihawtin Lunglei Sub-Headquarters YMA Conference Hall-ah Lok Kalyan Mela khuhhawnna hun hman a ni a. PMAY-Urban hnuaia Angikaar Campaign 2025 buatsaih mek chhunzawm nan PM Awas Mela Shehri hun hman nghal a ni.
Lunglei District Urban Development Officer Pi Lalhruaitluangi chuan Mela hi hawngin, khawlaia thil zuar inpho (street vendor), dawr luah lova sumdawngte’n dahkham ngai lova loan pung tlem, PM SVANidhi loan an puk theih dan chungchang leh khawpui chhung mi retheite tana in sak ṭanpuina (PMAY-U)-Housing For All chungchang a sawi fiah a. Senior Associate Pu V. Lallawmkima leh State Bank of India (SBI) Lunglei Branch-a Assistant Manager Pi Eizabeth Vanlalrempuii te’n loan la tur leh la mekte hriat tur pawimawh hrang hrang an sawi a. Loan dilna leh inzawh fiahna camp buatsaih chhunzawm a ni.
He hunah hian PMAY-U Housing For All chungchanga hriat duh leh harsatna neite tan Help Desk buatsaih a ni a. Help Desk hi kar khat chhung atan UD&PA Office-ah hawn chhunzawm a ni dawn a. In sak ṭanpuina chungchanga hriat chian duh leh harsatna neite’n hmang ṭangkai turin thawktute’n mipuite an ngen.
Lok Kalyan Mela hi street vendor-te tan October ni 1, 2025 thleng hawn tura ruahman niin, loan camp leh drive te buatsaih chhunzawm zel tum a ni a. PM SVANidhi loan la tawh leh an chhungte’n Central leh State sawrkar hnuaia welfare scheme hrang hrang aṭanga hamṭhatna an hmuh theihna turin SVANidhi Se Samriddhi hnuaiah zir chianna buatsaih tum a ni bawk.
