Lungleiah LMC Ward No. 6 huaihawtin Electric Veng Hmathlir 2027 sawi hona hun hman a ni
Lunglei Municipal Council (LMC) Ward No. 6-na Councillor Pu R. Lalremsiama hma laknain vawiin khan Lunglei DEO Conference Hall-ah ‘Electric Veng Hmathlir (Tun aṭanga 2027)’ sawi hona hun buatsaih niin, LMC Chairman Pu Lalzuithanga’n hun a hmanpui. Electric Veng hmathlir sawi hona hi Councillor Pu R. Lalremsiama chuan kaihruaiin, LMC chairman Pu Lalzuithanga’n a hawng a. LMC Chief Executive Officer Pu Donny Lalruatsanga leh Executive Councillor Pu Zorinsanga Hmar te pawhin telpuiin, he hunah hian LMC Ward No. 6-na (Electric Veng) huam chhunga kohhran leh NGO-te chuan an ward hmasawnna tura hmathlir an neih, committee ṭheuhvin a pawmte an sawi ho a ni.
LMC Chairman Pu Lalzuithanga chuan Ward No. 6-na, Electric Vengin Sustainable Development Goals tin zawna hmasawnna hna thawh kawngah lawmman pakhatna an dawng chu lawmawm a tih thu leh a lawmpui thu a sawi a. Lunglei chu khawpui a nih tawh avangin a mi chengte pawh khawpui rilru pu tura an inbuatsaih a ṭul tih sawiin, municipal nihnain a ken tel hrang hrangte zo lova inngai a, phur rita la mai lovin, rilru put hmang thlak a, harsatnate su tlang tura theih tawp chhuah duhna rilru put zawk a ṭul nia a hriat thu a sawi a. Khawpui nun zira khawsak honaah ṭan rualna leh thawh hona ṭha a pawimawh thu a sawi. Councillor Pu R. Lalremsiama chuan Ward Committee-in hmasawnna hna a thawhna kawngah mipui zau zawk huap zo tura ruahmanna a awm theih nan khawtlanga kohhran hrang hrang leh NGO-te chu Electric Veng hmasawnna tura an beisei leh duhte thawh khawm turin a ngen tih sawiin, sawi hona chu Ward Committee chuan hmasawnna hna thawh tur project atan hmachhawpah a nei zui dawn tih a sawi.
LMC Executive Councillor Pu Zorinsanga Hmar leh CEO Pu Donny Lalruatsanga te pawhin thu sawiin, LMC chuan kum 2 chhungin nasa takin hma a sawn tih an sawi a. Lunglei khawpui chu mahnia inenkawl thei tura rorelna hran nei a nih tawh avangin, mipuiin sawrkara an thil chawi leh thawhte chu khawpui leh mipui hmasawnna atan hman leh nghal zel a nih tawh tur thu an sawi. He hunah hian Pu Lalrotluanga chuan ‘Electric Veng hmasawnna atana hmathlir’ tih thupui hmangin thu a sawi a. Electric Veng chhunga NGO hrang hrang leh kohhran hrang hrangte chuan Electric Veng hmasawnna atana Ward Committee-in a tihhlawhtlin atana ṭha an tih, committee-a an rel ṭheuh te an sawi bakah, chawhnu lamah Zonet JB Editor Pu Chawngchhuana Chongthu kaihhruaiin sawi hona hun buatsaih zui a ni a. Hna thawh tur thawh khawm zingah, hma lakna hmasaa neih tur thil 18 thlan chhuahte chu NGO leh kohhran ai awhte’n an pawmpui bawk.
