Lungleiah khawl hmanga finfiah theih tura raltlante chhinchhiah dan tur zir ho a ni
Vawiin khan Lunglei District Level Committee on Myanmar & Bangladesh Refugees (DLCMBR) huaihawtin Lunglei SP Office-a Police Computer Training Centre-ah Myanmar leh Bangladesh aṭanga raltlante khawl hmanga an nihna finfiah theihna tura chhinchhiah dan tur zir hona, ‘Training on Foreigners Identification Portal & Biometric Enrolment’ buatsaih a ni.He hun hi Lunglei Sub-Deputy Commissioner Pi Lalnunchhani Hnamte chuan kaihruaiin, training buatsaih chhan a sawi fiah a.
Lunglei District Additional Superintendent of Police Pu K. Beihmotaosa chuan raltlan chhinchhiah chungchanga hma lak tawhna leh hma lak zel dan tur sawi fiahin, raltlante chhinchhiahna kalpui tur hian July ni 2, 2025-a DLCMBR thu rel bawhzuiin Biometric Enrolment Team 10 siam a nih thu leh hmanraw mamawh belhte Home Department lamah dil mek a nih thu a sawi a. Chhinchhiahna hi kumin July thla chhunga kalpui ṭan tum a nih thu te, Ramthar Camp chu bul ṭan nan hman tum a nih thu te, chumi hnuah refugee camp dang 8-ah chhunzawm chhoh a nih tur thu te sawiin, camp pawna awmte chhinchhiah dan tur pawh ruahman mek a nih thu a sawi a.
Raltlante chhinchhiah fel tura hma laknaah hian sawrkar, tlawmngai pawl leh mipuite ṭan rualna leh thawh hona a ṭul thu sawiin, enrolment tihna tur hmanruate entirin a hman dan tur tlangpui a sawi fiah bawk. He training hi enrolment team member mi 27 te’n chhimin, master trainer pahnih – Pu CZ Lalnilianpuia leh Pu C. Lalremruata te’n hriat tur ṭul leh pawimawh hrang hrang an zirtir a. Zawhna leh chhanna leh sawi hona hun hman a ni bawk.
