Lungleiah Green-Ag Project hnuaia Green Landscape Implementation Unit Lunglei Technical Support Group an ṭhu khawm
Vawiin khan Green-Ag Project Mizoram hnuaia Green Landscape Implementation Unit (GLIU) Lunglei Technical Support Group (TSG) chu a ṭum 10 nan an Chairman, Lunglei District Bawrhsap Pi Navneet Mann hovin Lunglei DC Conference Hall-ah an ṭhu khawm a. Green-Ag Project hma lak tawhna leh kum 2025-2026 atana ruahmannate an thlir ho.
He ṭhut khawmah hian TSG member line department hrang hrangte an kal khawm a. Green-Ag Project hnuaia lo neih, ran vulh, ramngaw humhalh leh a kaihhnawih peng hrang hranga hma lakna leh hmachhawpte chu State Technical Coordinator Pu Kenny Vanlalhriatpuia leh Green-Ag Project Mizoram Team Leader Pi Lalchhuanawmi te hnen aṭangin ngaihthlak a ni a. Technical Support Group meeting vawi 10-na chuan kum 2025-26 atana hna thawhna tur ruahman cheng vaibelchhe 11.9 chu an pawm a ni.
TSG Chairman chuan he project hi Lunglei District-in a ṭangkaipui theih nan line department kal khawmte chu thawh hona ṭha zawk nei turin a sawm a. TSG Member Secretary, Lunglei District Agriculture Officer Pu VL Hmangaihchhunga chuan lawm thu sawina hun a hmang bawk.
Green-Ag Project hi Dampa Tiger Reserve leh Thorang Wildlife Sanctuary chhehvel khua (fringe village) 34 (Mamit District-a khaw 21 leh Lunglei District-a khaw 13)-ah kalpui a ni a. Kumin 2025 kum kal mekah Piggery Investment (vawk vulh ṭanpuina) hnuaiah Lunglei District-a khaw 8-a chhungkaw 21 hnenah vawkpui sem tawh a ni a. Khaw 5-ah Mizo hmarcha chingtute tana a chin dan zir hona (Farmer Field School on Mizo chilli) kalpui tawh niin, khaw 9-ah vaimim (maize) chingtute tan Farmer Field School kalpui a ni tawh bawk.
