Lungleiah Bawrhsap hovin ‘Viksit Krishi Sankalp Abhiyan’ kalpui tur chungchang sawi ho a ni
Vawiin khan Sawrkar Laipui ruahmannaa kut hna thawktute hnena tun lai thiamna hman ṭangkai dan zirtir runpui, ‘Viksit Krishi Sankalp Abhiyan’ (VKSA) kalpui tur chungchanga Lunglei District tana ruahmanna hrang hrang sawi hovin District Bawrhsap Pi Navneet Mann kaihhruaiin DC Conference Hall-ah line department hrang hrang hotute an ṭhu khawm. He ṭhut khawmah hian DC office-a officer-te, Krishi Vigyan Kendra (KVK) Lunglei, Agriculture & Farmers Welfare, Horticulture, AH&Vety, Fisheries, Soil, Sericulture leh I&PR department ai awhte an tel a. Lunglei District chhunga VKSA kalpui dan tur te, campaign buatsaihna tur khaw hrang hrang te, feh chhuak tur team ruahman dan leh thil ṭul hrang hrang an sawi ho a ni.
Viksit Krishi Sankalp Abhiyan hi India ram pumah May ni 29, 2025 aṭanga June ni 12, 2025 (ni 15) chhunga kalpui tur niin, he campaign chhung hian lo neitu leh kut hna thawktute thawh chhuah leh thar chhuah tipung tur leh an thawh chhuah aṭanga hlawkna tam zawk an tel theihna tura tun lai thiamna hrang hrang an hman ṭangkai theih dan tur te, thlai chi ṭha leh lo neih dan ṭha an hman thiam theih nan leh sawrkarin kut hna thawktute tana hamṭhatna hrang hrang a duante an hman ṭangkai theih nan te mi thiamte’n an khuaah kal chilhin zirtirna an pe dawn a ni. VKSA campaign kalpui turah hian KVK-a Senior Scientist & Head-te chu District Nodal Officer-a ruat niin, Lunglei District leh Hnahthial District chu KVK Lunglei hma lakna tur huam chhunga a awm angin district khat angin kalpui a ni dawn a. May ni 29-a VKSA bul ṭanna hi Hnahthialah buatsaih tur niin, Hnahthial District chhungah ni 4 chhung campaign kalpui hmasak a ni ang a. June ni 4, 2025 aṭangin Lunglei District chhungah campaign hi kalpui chhunzawm a ni ang.
Lunglei District chhunga VKSA kalpui tur hian team pathum siam niin, team tinah hian ICAR, KVK, Agriculture, Horticulture, AH&Vety, Fisheries, Soil leh Sericulture-a mi thiamte bakah, FPO/SHG/kut hna thawktu ai awhte an tel a. Team tin hian ni khatah khaw pathum zel tlawhin, kut hna thawktute nen inkawm hona leh thil pawimawh hrang hrang zir hona an buatsaih ṭhin dawn a. Campaign kalpui chhung hian Lunglei District chhunga khaw 72 tuam chhuah hman tum a ni.
