Lungleiah Agriculture Director hovin kut hna thawktute leh agriculture mi thiamte inkawm hona hun buatsaih a ni
Vawiin khan Lunglei Agriculture Conference Hall-ah Agriculture Technology Management Agency (ATMA) leh District Agriculture Office (DAO) Lunglei District ṭang kawp huaihawtin kut hna thawktute leh agriculture mi thiamte inkawm hona, “Farmers Scientist Interaction” hun buatsaih a ni a. Mizoram sawrkara Agriculture & Farmers Welfare (A&FW) Director Pu Vanlalthlamuana chuan Khuallian niin hun a hmanpui.
Agriculture Director Pu Vanlalthlamuana chuan sawrkarin kut hna thawktute tan ruahmanna ṭha tak tak duangin, kut hna thawktute hmasawnna tur a ngaihtuah reng tih sawiin, kut hna thawktute chu sawrkar ruahmannate chhawr ṭangkai thei tura inbuatsaih turin a chah a. Department mi thiamte rawn taima tur leh mi thiamte thurawn leh kaihhruaina ngai pawimawh tura chahin, an harsatnate chu department-a thawktute hnenah thlen zung zung ṭhin turin a chah bawk.
Agriculture Joint Director Pu C. Malsawmkima leh Deputy Director Pu K. Laltlanmawia te pawhin hun hmanpuiin, Lunglei District chhunga khaw hrang hrang aṭangin kut hna thawktu (farmer)-te an kal khawm a. Lunglei DAO Dr Samuel Lalliansanga’n hun kaihruaiin, Krishi Vigyan Kendra (KVK) Lungleia Senior Scientist and Head Dr Henry Saplalrinliana chuan kut hna thawktute tana hriat tur pawimawh hrang hrang a zirtir a. Kut hna thawktute nen sawi hona hun hlawk tak hman a ni bawk.
Lungleia hun hman bakah hian Agriculture hotute chuan Haulawnga Huisih Zauvah lo neitute nen hun an hmang ho bawk.
