Lungleia “Book Nest Initiative” hnuaia lehkhabu khawn khawm kalpui mekah bu 6,000 chuang khawn chhuah a ni tawh
Lunglei District Bawrhsap hma laknaa Lungsen Aspirational Block-a zirlaite tana Lunglei khawpui chhunga lehkhabu khawn khawm runpui, “Book Nest Initiative” kalpui mekah, September ni 8, 2025 aṭang khan Lunglei khawpui chhunga Sub-Headquarters YMA (Young Mizo Association) hnuaia YMA branch 21 te’n an huam chhungah lehkhabu khawn khawmin, lehkhabu 6,000 chuang khawn chhuah a ni tawh.
YMA branch hrang hrang hnuaia section YMA te chuan an huam chhung in tinah kal chilhin zirlaibu leh thawnthu bu hluite an khawn khawm a. Lehkhabu khawn khawm sa hi branch tinah YMA leh Self Help Group (SHG)-te’n thliar felin, sem chhuah theih turin an ruahman a. Lunglei khawpuia YMA branch 21 bakah, Lungsena YMA branch 3 pawhin lehkhabu hi khawn ve bawkin, Lungleia Astronomy Lab siamtu, AstroScape neitu, Pu Aryan Mishra (New Delhi) pawhin lehkhabu 25 a thawh ve bawk.
Lunglei khawpui chhunga YMA branch 11 chuan lehkhabu khawn leh thliar fel hi zo tawhin, hemi aṭang hian lehkhabu 6,299 hmuh a ni tawh a. Branch eng emaw zat chuan la khawn mekin, thliar fel an la hmabak bawk. Lehkhabute hi sem chhuah theiha ruahman fel a nih hnuah Lungsen Aspirational Block huam chhunga sawrkar sikul 60 thlan chhuahte hnenah sem tura ruahman a ni.
