Lunglei District-in vohbikte tana hma lak ṭhat avangin National Award 2025 for Best District in Accessible India Campaign Implementation lawmman a dawng
Vawiin khan International Day of Persons with Disabilities pualin New Delhi-ah vohbikte tana hma la ṭhate chawimawina, National Awards for the Empowerment of Persons with Disabilities 2025 hrang hrang sem a ni a. Lunglei District (Mizoram) chuan vohbikte tana remchanna leh awlsamna tura hma lakna, Accessible India Campaign (Sugamya Bharat Abhiyan) kalpuina kawnga thawh ṭhat avangin National Award 2025 for Best District in Accessible India Campaign Implementation a dawng. He award hi Lunglei District Bawrhsap (Deputy Commissioner) Pi Navneet Mann chuan India President Pi Droupadi Murmu kut aṭangin a dawng a ni.
He award hi Lunglei District Bawrhsap kaihhruaina hnuaia Lunglei District-a vohbikte chawi kanna tur ruahmanna, “Project LEAP” (Lunglei’s Empowerment for Access and Equity for All Persons) hnuaia hma lakna hrang hrang avangin Lunglei District Administration hnenah hian hlan a ni a. He Project hi vohbikte’n ram leh khawtlanga an chanvo an hmuh theihna tur leh vohbikte huap zo hma lakna a awm theih nana inzirtirna leh hma lakna tura ruahman niin, India ram pum huap pawha hma lakna chhinchhiah tlak leh entawn tlak tak pakhat a ni. He hma lakna hnuaiah hian kumin 2025 January – March inkar chhung khan District chhung khaw hrang hrangah in tina kal chilhin vohbikte dinhmun zir chianna (disability survey) kalpui niin, vohbik 1,400 chuang chhinchhiah an ni a.
Hmun hrang hrangah vohbikte hriselna dinhmun endikna (health assessment camp) buatsaih niin, vohbik mi 1,091 te’n an chhawr ṭangkai a, hemi kal tlang hian Unique Disability Identity (UDID) Card thar eng emaw zat siam a nih bakah, ṭanpuina hmanraw hrang hrang dilsak an ni a. June 2025 khan ALIMCO nen ṭang kawpin vohbikte ṭanpuina hmanraw chi hrang hrang cheng nuai 52 hu chu ni khat thil thu-ah mi 740 hnenah sem chhuah a ni bawk. He’ng bakah hian vohbikte’n awlsam taka vantlang hmun pawimawhte an kal pawh theihna tur leh service hrang hrang an hman theihna tura ruahmanna a awm theih nan access audit buatsaih niin, vohbikte tana pan remchang turin inthlanna hmunhmate ruahman a ni a. Hlawhtling takin vohbikte kut – Purple Fair buatsaih a ni bawk.
