Lunglei District-ah furpui inbuatsaihna feh chhuah, Viksit Krishi Sankalp Abhiyan kalpui chhunzawm a ni
India ram puma furpui thlai chin hun (Kharif season) lo thleng tur atana inbuatsaih nana kut hna thawktute an khuaa kal chilh runpui, Viksit Krishi Sankalp Abhiyan (VKSA) kalpui mek chu vawiin khan a ni nga nan Lunglei District chhungah kalpui chhunzawm a ni a. Agriculture, Horticulture, AH & Veterinary, Krishi Vigyan Kendra (KVK), Soil, Sericulture leh Fisheries official-te chu team thumah insiamin khua/veng pakuaah an feh chhuak leh a ni.
VKSA team feh chhuakte hian Silgur, Bulungsuri, Tipperaghat, Ṭawipui North-I, Ṭhualṭhu, Ramthar, Rangte, Sazaikawn leh Rahsiveng te tlawhin, kut hna thawktu mi 1,158 (mipa 652 leh hmeichhia 506) te nen hun an hmang ho va. Thlai chin, ran vulh, sangha leh pangang khawi leh kut hna thawh kaihhnawiha hriat tur pawimawh hrang hrangte, thlai chi ṭha leh tun lai thiamna hman ṭangkai dan te, thlai leh ran natna enkawl dan te, lei enkawl dan leh lei ṭha hman dan te zirtirin, sawrkarin kut hna thawktute tana hamṭhatna a duan hrang hrangte an hrilhfiah a. Zawhna leh chhanna leh sawi hona hun hlawk tak hman ho a ni bawk.
VKSA campaign hi India ram pumah May ni 29, 2025 khan kalpui ṭan niin, Lunglei District-ah chuan June ni 5 aṭang khan kalpui ṭan a ni a. Ni nga chhungin khaw 39-ah hun hman tawh niin, kut hna thawktu mi 5,240 (mipa 3,155 leh hmeichhia 2,085)-in an chhim a ni.
