Lunglei District-a Mausen khuaah NABARD Foundation Day vawi 44-na pualin hun hman a ni
National Bank for Agriculture and Rural Development (NABARD) din ni (Foundation Day) vawi 44-na pualin vawiin khan Lunglei District-a Mausen khuaah NABARD hnuaia hma lakna hrang hrang puanzarna hun buatsaih niin, thing phun a ni bawk. NABARD Foundation Day puala hun hmanah hian NABARD Lunglei District Development Manager Pi Chiinngaihkim Phiamphu leh MCAB Lunglei AG-I Pu H. Remsangpuia te bakah, Lushai Agriculture Producer Company Ltd-a Board of Directors leh FPO member-te an tel a. NABARD DDM Pi Chiinngaihkim Phiamphu chuan NABARD kal tlanga Lunglei District chhunga hmasawnna hna thawh hrang hrang leh mipuite’n an chhawr dan te a tar lang a.
Haulawng, Vanhne leh Sairepa lui kam humhalhna tur springshed development project-te, thingtlang mite tihhmasawnna tur tribal development project hnuaia hma lakna hrang hrang te, chawhmeh bazar (rural haat) leh vantlang dawr (gram dukan) sak te, thiam thil inzirtirna (skill development programme) leh sumdawn dan inzirtirna (micro-entrepreneurship development programme) buatsaih te chu Lunglei District-a hma lakna lian zual a nih thu a tar lang. MCAB AG-I Pu H. Remsangpuia chuan Primary Agricultural Credit Societies (PACS) te hnena MCAB kal tlanga ṭanpuina pek a nih dan leh kut hna thawktute’n M-PACS kal tlanga sum an puk aṭanga sumdawnna bul an ṭan theih dan te a tar lang bawk.
Hemi hnu hian Ministry of Environment, Forest and Climate Change hnuaia ramngaw siam belhna tura hma lakna, “Ek Ped Maa Ke Naam” pualin Mausen khuaah hian thing ṭiak eng emaw zat phun nghal a ni. NABARD hi July ni 12, 1982 khan din niin, India rama agriculture leh thingtlang hmasawnna atana hma latu lian ber pakhat a ni a. Kumina Foundation Day lawmna hi July 12 – 19 inkar chhungin kawng hrang hrangin buatsaih a ni.
