Lunglei Bawrhsap hovin Lungleia Territorial Army ‘Mizo Company’ hmunhma tur leh mamawh hrang hrang ngaihtuah dan tur sawi ho a ni
Mizoram sawrkar hma laknaa Territorial Army (TA) ‘Mizo Company’ din turah Lungleia an awmna hmun tur leh mamawh hrang hrang ngaihtuah dan turte sawi hovin vawiin khan Lunglei District Bawrhsap Pi Navneet Mann hovin a hna thawh pindanah ṭhut khawm a ni.
He ṭhut khawmah hian PHED Executive Engineer, P&ED EE, LR&S Settlement Officer, DIPRO leh SDC te bakah, 166 Infantry Battalion (Territorial Army), Home & Hearth, Assam hnuaia ‘Mizo Company’ Officer Commanding (OC) Lt Col. Prashant Kakade leh JCO te an tel a. Bawrhsap Pi Navneet Mann chuan TA Mizo Company chu Mizoram sawrkarin a ngenna avanga din tura hma lakna kal mek a nih thu sawiin, Mizorama sipai leh mipui thawh hona ṭha zawk a awm theihna tur leh Mizo ṭhalaite tana hna tam zawk siamtu tur a nih thu a sawi a. Mizo Company chhawrtu tur chu Mizo ṭhalaite leh Mizoram mipuite a nih angin an inben belna turah leh an hna thawhnaah sawrkar department hrang hrang leh mipuite’n a theih ang anga lo thawhpui a, lo chhawmdawl a pawimawh a ni, a ti.
TA Mizo Company awmna hmun tur atan hian Lunglei Kawmzawla sipai luah ram chhungah hmunhma ruahman tum niin, ram acre 20-a zau lakna tur hriattirna (preliminary notification) chu June ni 4, 2025 khan Lunglei District Collector & Deputy Commissioner chuan a chhuah tawh a. He lai hmuna sipai an inben belna atana PHED aṭanga tui pekna tur leh P&ED aṭanga eng pekna tur mamawh hrang hrang chu state sawrkarah thlenin, hma lak zui ni se, tih a ni.
