LMC Chairman Pu Lalzuithanga’n Lunglei Press Club-a Committee Room leh mimal luah tur pindan chei ṭhat a hawng
Mizoram Journalists’ Association (MJA) Lunglei District-in ṭhut khawm pindan (committee room) atan leh man chawia luah atana Lunglei Press Club an chei ṭhat chu nimin khan Lunglei Municipal Council (LMC) Chairman Pu Lalzuithanga’n a hawng.
Committee room thar leh residential building chei ṭhat hawn puala Conference Hall-a inkhawm buatsaihah LMC Chairman Pu Lalzuithanga chuan chanchinbu mite hna chu eng lai pawha ṭan mar pat ngai, inthlahdah theih loh a nih avangin a hahthlakin, mi nazawng thawh chi a ni lo tih sawiin, chuti ang kara lungawi taka, ram leh hnam rawngbawlna rilru pu-a thawk ṭhin chanchinbu mite chu an ngaihsanawm hle a ni, a ti a. Digital media khawvelah thu thlit fim loh leh ṭangkai lo leng vel karah journalist-te chu a hman dan ṭha zawk leh dik zawk mi dangte kawhhmuh a, fuihtu an ni zel chu fakawm a tih thu sawiin, an hna hlutna hria a beidawng lova ke pen zel turin a chah a. LMC hnuaiah a ṭha zawnga Lunglei khawpui siam chho turin hma lak mek a nih thu sawiin, hun inthlakthleng lai aia hun ṭha leh remchang a awm loh thu leh he hun remchang hi bawhpelh lova chhawr ṭangkai a ṭul thu a sawi a. NREGS ngaia lunglen rei lutuk chu hmasawn thei lova mipui uai bettu nia a hriat thu sawiin, LMC aṭangin rethei leh harsa zawkte chawi kanna tur leh mipui hmasawnna rualkhai a awm thei ang tih beisei chunga LMC hma lakna theih tawpa thlawp turin mipuite a sawm a. MJA te’n LMC an thawhpuinaah lawm thu sawiin, an hma laknate ṭha taka an puanzarsak ṭhin chu chhunzawm zel tur leh a ṭulnaah finchhuah zel turin a sawm bawk.
He hun hi District MJA President Pu H. Lalthansanga’n a kaihruai a. District Information & Public Relations Officer Pu C. Lalhruaitluanga chuan MJA member-te fuihna thu sawiin, print, electronic leh digital media kal tlanga an rawngbawlnaaah an tih chin leh dai chin apiang an rama siam turin hneh tak leh fak tlaka hlrn chhuak zel turin a chah a. Tun lai hmasawnna leh changkanna mil leh media hawi lam thlir chunga hmasawnna tur leh puan in zauhna tur an neih, a bik takin digital media lamah ṭan la a, hmahruaitu leh khalh kaltu nih tum turin a chah bawk.
Lunglei Times chanchinbu blogspot page thar – lungleitimes. blogspot.com chu DIPRO Pu C. Lalhruaitluanga chuan a tlangzarh nghal a. District MJA Secretary Pu Thanghmingliana Renthlei chuan report pein, Treasurer Pu K. Lalrinpuia chuan Lunglei Press Club Conference Hall, Committee Room leh Rental House chei ṭhat hna thawh dan a tar lang bawk.
Lunglei Press Club chei ṭhat hna hi May ni 2 aṭanga July ni 8 (ni 68) chhung thawh niin, a zavaiin cheng nuai 2.5 vel sen a ni a. Hna hi District MJA sum khawl sa aṭanga thawh niin, conference hall, committee room leh mimal luah tur pindan te chu rawng hnawih thar a nih bakah, pindan leh a chhung bungrua chi hrang hrang chei ṭhat leh lei thar a ni.
