Lesde minister-in lesde kut 2026 kharna hun hmanpui
Vawiin khan Labour Employment Skill Development & Entrepreneurship (LESDE) Department buatsaih LESDE Kut 2026 chu a kharna hun Aizawl Lammualah hman a ni a. He hunah hian Pu Lalnghinglova Hmar, Minister, LESDE Department chu khuallian niin, Dr. Lalhriatzuali Ralte, Secretary, LESDE chuan hun a kaihruai a. MLA Er. Ginzalala leh MLA Pi Baryl Vanneihsangi te pawh he Kut kharna inkhawmah hian an tel a ni.
Minister Pu Lalnghinglova Hmar chuan LESDE Kut chu kuthnathawkte, thiamthil neite leh hna zawng mekte puala buatsaih a nih thu sawiin, LESDE Department inhmelhriattirna leh sawrkar hnuaia hamthatna hrang hrang an dawn theihte pholanna hun a nih thu a sawi a. LESDE Department chu department lian ni lo mahse Central Ministry 5 – Labour Ministry, Skill Development & Entrepreneurship Ministry, Ministry of External Affairs leh Ministry of Corporate Affairs nen indawrin an thawhho thu a tarlang a. Mizoram pawh entrepreneurship leh thiamthil zir kawngah hma kan sawn viau rualin, thil tha zawk leh danglam zawk ngaihtuah chhuaka siam chhuah tum zel turin kalkhawmte a fuih a. LESDE Kut a hlawhtlin theih nana thawktute leh a hluttu mipuite hnenah lawmthu a sawi bawk a ni.
Pi Lalhriatzuali Ralte chuan kalkhawmte lawmna thu sawiin, taimakna leh tumruhna chu hlawhtlinna tura thil pawimawh ber an nih thu a sawi a. Sawrkar chuan India ram mai nilo ram pawn thlenga thalaite hna thawh theihna tur kawng a dap char char thu tarlangin, thalaite chu sawrkarin an hna zawnna leh thiamthil an zir theihna tura hma a lakna hrang hrangte ngaihvena hmang tangkai turin a chah a ni.
Pu John Tanpuia, Director, LESDE hnen atangin Kut report ngaihthlak a ni a. Lesde Kut hi February ni 10-a tan niin, a hawnna-ah Khuallian Governor Dr. Vijay Kumar Singh chuan Mizoram Building and Other Construction Workers Welfare Board (MBOCWWB) hnuaia scheme pahnih Eizawma Kailawn leh Rahbi Chertu chu a hawng a.
Kut ni hnihna-ah State Level Vendor Development Programme, Public Sector Unit 5 —Power Grid Corporation of India Limited, National SC/ST Hub Guwahati, Department of Food Technology Mizoram University, Mizoram Rural Bank (MRB), Food Corporation of India-te hnen atangin seminar neih a ni a. Pradhan Mantri National Apprenticeship Promotion Scheme (PM NAPS) pawh neih niin establishment 20 vel leh apprentice 100 chuang vel zet an in ziak lut a ni.
