Leitlangpui Music Festival ropui taka buatsaih tum a ni
Tourism Minister Pi Lalrinpuii’n tun thla ni 14 atanga ni 16 thlenga Lungleia Leitlangpui Music Festival atan inbuatsaihna kalpui zel a nih thu sawiin festival chhim turin Mizoram mipuite a sawm tih a sawi. Vawiina Aizawl Press Club-a chanchinbumite a kawmnaah Minister chuan he thu hi sawiin Leitlangpui Music Festival-a hun hman dan tur sawiin a tan ni, ni 14-ah hawnna leh traditional day hman a nih tur thu a sawi a.
Ni hnihnaah beat contest intihsiakna neih a ni dawn tih sawiin a ni thumnaah zaithiamte an fuankhawm dawn thu a sawi a. Tlai tin concert a awm dawn thu leh a ni thumna bikah hranghlui zaithiamte nen Leitlangpui Night hman a nih dawn thu a sawi a. Festival-ah hian Museum of Leitlangpui History siam a nih dawn thu a sawi a ni. Minister chuan kum 1932-a favang awllen laia HW Carter, Mizo in Zochhawni pa tia an koh phurpuinaa Serkawn concert hlu tak an buatsaih zulzuiin Lunglei hming chawiin festival chu buatsaih a nih dawn thu a sawi a. Festival chu tender hmanga outsource a nih thu sawiin Brighter Co. & BBY Animals Event Management Team ten an buatsaih dawn thu a sawi a.
Hetihrual hian sorkar tello a buatsaih theih a nih loh avangin Lunglei bawrhsap chairman na hnuaiah organising committee din a nih thu a sawi a, Department hotuten chanchinbumite an hrilh danin he festival atan hian Ministry of Tourism atanga cheng nuai 25, NEC atangin cheng nuai 10 leh an department sum atangin cheng nuai 5, a vaiin cheng nuai 40 an neih mek thu leh, state sorkarah cheng nuai 20 dil belh mek a nih thu an sawi a ni.
