Larsap-in Ephatha Special School for the Deaf and Hard of Hearing dinchamphaphak vawi 9-na lawmna a hmanpui
Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Ephatha Society of Mizoram for the Deaf and Hard of Hearing (ESOMDHH) buatsaih, Ephatha Special School for the Deaf and Hard of Hearing dinchamphaphak vawi 9-na lawmna, College Veng, Aizawla neih chu Khuallian niin a hmanpui. Larsap General (Dr) Vijay Kumar Singh (Retd) chuan Ephatha Special School for the Blind and Hard of Hearing-te dinchamphaphak vawi 9-na lawmna hun a telpui thei chu lawmawm a tih thu leh, tun hun thleng thei tura society hotute, thawktute leh nu leh pate hmalakna fakawm a tih thu sawiin, “Nitinin classroom-ah thiamna, dawhtheihna leh ngilneihna in lantir bakah naupangte inrintawkna leh hlimna pein an theihna inthup in hai chhuah sak thin a, in inpekna leh rawngbawlna ngaihhlutawm tak hi ka chhuang hle a ni, a ti a. Bengngawng leh ri hriatna tha lo naupangte pual liau liaua Mizorama school awmchhun chu Mizoram tana meichher eng chhawmnungtu leh, hmangaihna leh thawhrimna hmanga hlawhtlinna a hmuh theih a ni tih lantirtu a nih thu a sawi bawk.
Larsap chuan vohbik naupangte enkawl kawngah inchhung khura inenkawlnain awmze thui tak a nei tih sawiin, hmangaihna leh an laka beiseina sang tak chuan naupangte chakna a pe a, harstanate paltlangin duhthusam an thleng thei thin a ni, a ti a. Nu leh pate chu fate hmalam hun atana mi pawimawh bik an nih avangin zirna tha an dawn theih nana theihtawp chhuah turin a chah a. Sawrkarin mitin huapzo zirna a kalpui mek hnuaiah zirna tibahlah thei ang chi reng reng a awm loh nana hmalak a nih thu sawiin, hemi kawnga Ephatha Special School for the Deaf and Hard of Hearing-te hmalakna chu mitin huapzo zirna a taka tichiangtu a ni, a ti a. Larsap chuan an dinchhan tihlawhtling turin a theihna zawn apiangah puih a inhuam thu sawiin, kalkhawmte chu Ephatha Special School for the Deaf and Hard of Hearing hmasawn zel nana theihtawp chhuah zel turin a chah a ni.
He hunah hian Pi Saihmingthangi, President, ESOMDHH chuan kalkhawmte lawmna thu sawiin, Rev. Dr. H. Vanlalruata’n hunserh a hmang a. Pu Samuel R. Lalhmangaiha, Principal, Ephatha Special School for the Deaf and Hard of Hearing hnen atangin report ngaihthlak a ni a. Pi Laldikkimi, Senior Adviser, ESOMDHH-in thu a sawi bakah zirlai naupangte’n special hmuhnawm tak tak an entir bawk a. Zirtirtu kal tha lawmman Larsap-in a hlan a, Pu Lalbuatsaiha, Adviser, ESOMDHH-in lawmthu sawiin hun hman a khar a. Hemi hnu hian chawhnuah Pi Jenny Lalbiaktlingi, Gen. Secretary, ESOMDHH kaihhruaiin awareness programme neih a ni.
