Larsap hovin Christmas Carol Service hmang
Mizoram Larsap General (Dr) Vijay Kumar Singh, PVSM, AVSM, YSM (Retd)) leh First Lady Pi Bharti Singh te chuan zanin khan Lok Bhavan-ah Aizawl West-I Area Masihi Sangati, Mizoram Presbyterian Church member-te lo mikhualin Christmas Carol Service hun hlimawm tak an hmang.
Larsap General (Dr) Vijay Kumar Singh chuan Christmas chu mitin huapzo leh hmun tina ngaihhlut hlawh a nih thu sawiin, he hun hi thinlung kawngkharte hawnga midangte tana malsawmna ni tura luanchhuahna, sum leh pai mai ni lo neih thil remchang ang angte hmanga phal taka midangte tanpuina hun a ni, a ti a. Khawngaihna leh lainatna lanitirna hun a nih thu pawh sawiin, zonun zemawi Tlawmngaihna a kentel tlat avangin Christmas leh Mizo khawtlang nun chu inhmeh a tih thu a sawi a. Larsap chuan Christmas lo thleng tur chuan remna leh muanna bakah inunauna thlen se a duh thu a sawi bawk.
He hunah hian Rev Lalhunthara, i/c Aizawl West Area Masihi Sangati hnen atangin thuchah ngaihthlak a ni a. Aizawl West-I Area Masihi Sangati, Mizoram Presbyterian Church member leh Standing Choir te’n Krismas hla mawi tak tak an rem a. Larsap te nupa hnenah Krismas thilpek an hlan a. An ni pawhin he hun hmanpuitu Aizawl West-I Area Masihi Sangati member-te chungah lawmthu sawiin Krismas thilpek an hlan a ni.
