Larsap General (Dr) Vijay Kumar Singh (Retd) hovin Beti Bachao Beti Padhao Plantation Drive 2025 hmang
State Hub for Empowerment of Women (SHEW), Directorate of Women & Child Development buatsaihin vawiin khan State Level Beti Bachao Beti Padhao Plantation Drive, 2025 chu Sumtual, Aizawl Smart City Project, MINECO-ah neih a ni a. He hun hi Larsap General (Dr) Vijay Kumar Singh, PVSM, AVSM, YSM (Retd) chuan khuallian niin a hmanpui a, Social Welfare, Women & Child Development Minister Pi Lalrinpuii chu khualzahawm a ni. Larsap, Minister leh official te’n hmeichhe naupangte dikna leh chanvo venhim leh enkawl tha pek pawimawh zia lantir nan Ashoka thing tiak an phun a ni.
Hemi pual hian Larsap General (Dr) Vijay Kumar Singh (Retd) chuan thu sawiin, Sawrkar laipui hmalakna Mission Shakti kaltlanga Beti Bachao Beti Padhao puala thing phun chuan hmeichhe naupangte hmasawnna tur leh environment tha nei tura hmalakna ngaihpawimawh a tulzia a entir a ni, a ti a. Hmeichhe naupang leh thing tiak phun te’n danglamna thlen turin enkawlna leh chhawmdawlna tha an dawn a tul tih sawiin, Larsap chuan vawiina thing tiak a phun chu Mizorama hmeichhe naupang zawng zawngte pual a nih thu leh hei hian chakna, finna leh zahawmna pe se tih chu a duhdan a nih thu a sawi bawk.
Larsap chuan hmeichhe naupangte chu zirna ngaipawimawh tur leh duhthusam an neihte puitlin tura theihtawp chhuah tura fuihin, in tan khawtlang, State leh India chu nghet takin a ding zel dawn a ni, a ti a. He huna thing phunte chuan hmasawnna, beiseina leh hmabak eng tak a lantir tih sawiin, thang lian zelin hrinna a pek mai bakah nghet takin a ding dawn a, hei hian hmeichhe naupangte dikna leh chanvo humhalh kawngah nghet takin kan ding tlat tih a entir dawn a ni, a ti a. Mizoram hmeichhiate chhuanawm a tih thu leh State leh ram hmel tidanglam theitu an nih theih thu tarlangin, India ram intodelh leh changkang ‘Vikshit Bharat 2047’ puitlin thei tura pawimawh tak an nih thu a sawi bawk.
Thusawitu dang Social Welfare, Women & Child Development Minister Pi Lalrinpuii chuan thawhhona tha tak hnuaiah hmeichhe naupangte dinhmun chawikanna scheme pawimawh tak Beti Bachao Beti Padhao (BBBP) kalpui a ni chu lawmawm a tih thu a sawi a. Mizoram chuan Sex Ratio at Birth dinhmun tha tak, national level aia tha zawk kum 2022-23 ah 935 leh kum 2023-24 ah 956 te a neih thu a sawi a. Beti Bachao Beti Padhoa chungchang inzirtirna nasa taka kalpui a nih thu tarlangin, nikumah IEC tiam lovin mi 70,208 te hnenah zirtirna pek a nih thu leh plantation drive pawi tum 54 neih a nih thu a sawi a. Larsap-in he hun a telpui chu lawmawm tiin, Mizorama BBBP kalpui zelna kawngah rah tha a chhuah ngei a beisei thu a sawi bawk.
He hunah hian Pi Lalzarmawii, Commissioner & Secretary, Social Welfare, Women & Child Development chuan kalkhawmte lawmna thu sawiin, Pi Zoramthangi Chhangte, Director, Women & Child Development chuan lawmthu sawiin hemi puala hun hman a khar a. Thing tiak phunin chhunzawmin, Larsap General (Dr) Vijay Kumar Singh (Retd), Social Welfare, Women & Child Development Minister Pi Lalrinpuii leh Commissioner & Secretary Pi Lalzarmawii te bakah Chief Electoral Officer Dr. Lalrozama leh Law & Judicial Secretary Pu T.L. Guite te’n Ashoka thing tiak an phun a ni.
