LAILAK M-PACS hawn a ni
Vawiin khan Lailak khawtlangin an mamawh tak leh tangkai taka an hman turin, LAILAK Multipurpose Primary Agricultural Credit Coop Society(M-PACS) chu Pu Lalnunsanga, Apex Bank Chairman-in a hawng.
Hawnna puala hun hmanah hian Pu Lalnunsanga, Chairman, Mizoram Cooperative Apex Bank chuan thusawiin, Khaw tinah Bank kalpui theih a nih loh thu leh mi cheng zat leh chhungkaw awm zat milte bakah an eizawnna mil tein Survey neih thin a ni tih a sawi a. Chutiang tehfungte pal tlanga mahni intodelh leh mamawh te tana thian hnai, Bank aiawh tura Lailak M-PACS din a ni ta chu Lailak khua chu a lawmpui tak zet thu a sawi a. In tin atanga lungrual taka Member leh Shareholder ni turin khawtlang mipuite chu sawmin,, rinawmna leh hmangaihna dik tak nen hlawhtling taka dingchhuak ngei turin duhsakna a hlan nghal bawk a ni.
Hawnna inkhawm hi Lailak M-PACS Chairman Pu Lalpeka’n a kaihruai a, khawtlang hruaitu VC te, MHIP, YMA leh Upa Pawl te an tel kim hle a.Pu R. Lalrempuia, Director, Apex Bank leh Mizoram pumpui pawh a PACS tha leh entawntlak KHANPUI M-PACS Chairman Pu Laltluanga leh Secretary Pu RK Rohluna te pawh he hunah hian an tel ve a. Lailak society hruaitu te leh khawtlang hruaitu te hian thawhhona tha tak hnuaiah M-PACS Office a tan VC House hman rih an remti a ni.
