KTP General Conference Saitual a hman turah inbuatsaihna peihfel thawkhat tawh a ni
KTP General Conference Saitual a hman turah inbuatsaihna ngawrh takin kalpui zel a ni a, tunah hian hnathawh tur zualpui thawh zawh tawh niin khawtlang mipuite pawh mikhual thleng turin an inpeih tawh.
Pandal hi kum danga la tih ngai loh angin Mark Advertising in an sa a, thutna hi mi 15,000 vel leng thei tura ruahman niin Pandal hi adung feet 250, a vang feet 180 a zau niin, a chheh vel hmun engemaw zat chu inkhawm chhim theih tura ruahman a ni.
Hnatlang hi nimin thleng khan vawi 28 koh tawh a ni a, chhiar hleih theih loh sub committe peng hrang hrang hnatlang chhun leh zanah a awm reng bawk. Hnatlangah hian tualchhung mite bakah khaw thenawmte an thawk chhuak thin a, tha bakah sum fai tanpuina engemawzat khaw thenawm leh Kohhran hrang hrang atanga an dawn avangte, Chaltlang Branch in Inkhawmpui stage banner a thlawn liau liauva an siam sak avangin inkhawmpui thlengtute chuan lawmthu an sawi a ni.
