Kolasibah Lirnghing Thlen Thulha Chet Lak Dan Tur Mock Drill Neih A Ni
Vawiin khan Kolasib khawpui chhung hmun hrang hrangah lirnghing a thlen thulha chet lak dan tur enchhinna (Mock Drill) neih a ni a. He hunah hian National Highway-a leimin thleng thei te, relief camp, sawrkar office, bazar leh residential area-a chhiatrupna thleng thei te a tak anga chan a ni.
Mock Drill hi zing dar 9:30-ah tan niin, chhiatrupna thlenna hmuna chet la tur chhanchhuah hna thawktu (Rescue Operation Team) te chu DC Complex kawtzawlah inhmukhawmin, heta tang hian an duty-na hmun tur theuh an pan a ni.
Chhanchhuah hna thawh a nih lai hian DC Conference Hall-ah Brig. Ravinder Gurung, Sr. Consultant, National Disaster Management Authority (NDMA) hovin Incidence Response Team te chuan Video Conference hmangin Mock Drill neihna hmun hrang hrangte an vil a. Brig. Gurung hian Kolasib District bakah Mamit leh Champhai District-a Mock Drill neih mekte pawh a vil tel nghal bawk a ni.
Brig. Ravinder Gurung chuan DC Conference Hall-a debriefing neihna ah thu sawiin, chhiatrupna thlen thulha inbuatsaihna pawimawh zia a tarlang a. Department hrang hrangte chu chhiatrupna a thlen thulha hma an lak dan tur ‘Disaster Plan’ mumal tak nei theuh turin a chah a ni.
A bik takin Public Health Engineering (PHE) Department chu Disaster Plan fel tak nei tura chahin, tui dahkhawlna (Reserve Reservoir) an neih a pawimawh thu a sawi a, “Mipuiten chhiatrupna an tawh hunah eitur aiin tui an mamawh hmasa zawk thin a ni,” a ti. Hemi bakah hian Power & Electricity (P&E), Transport, Public Works Department (PWD), Hospital leh Internet Service Provider-te pawh chhiatrupna a thlen thulha plan mumal tak nei turin a chah bawk. Inbiakpawhna tha communication chu a pawimawh zia tarlangin, heng chhanchhuah hna te hi communication tha a awm chuan a tam zawk hi kan sukiang thei a ni, a ti bawk.
Vawiina Kolasib-a Mock Drill neihnaah hian lirnghing a thlen thulha chet lak dan tur hrang hrang te, in leh lo chim kara tangte chhanchhuah dan te leh hliam tuar buaipui dan te a tak angin entir a ni a. He hunah hian National Disaster Response Force (NDRF), KolasibPolice, State Disaster Response Force (SDRF) Mualvum, Fire & Emergency Services, Medical Team leh Quick Response Team (QRT) te bakah, school naupangte, sawrkar hnathawkte leh volunteer ruat bikte an tel a ni.
