Kolasibah internet hrui leh cable tv hrui zam hnawk thenfai dan tur chungchang ngaihtuahin thukhawmna neih a ni
Vawiin chawhnu khan Kolasib DC Office Conference Hall ah Kolasib khawpui chhung vengtina Internet leh Cable TV hrui felfai zawk leh mit ti khamlo zawk a zam dan tur chungchang ngaihtuahho a ni a. District Bawrhsap Pu Robert C. Lalhmangaiha chuan he hun hi a khaihruai a ni. Pu Robert C. Lalhmangaiha chuan Kolasib khawpui chu hmun hma rem leh khualzin tamtak ten an paltlang thin khaw pawimawh tak a nih thu a sawiin, Khawpui hmel a lan mawi zual zel theih nan veng tina khawtlang hruaituten theih tawp an chhuah a ngai a ni, a ti a. Internet Service Provider-te leh Cable TV neitute pawh in an Cable hruite felfai taka tawn khawmin, mit tikham lo zawnga an hruite zam a ngaih thu a tarlang a. Khawpui hmel mawina chu mitin kutah a innghah thu a sawi bawk.
Vawiin thutkhawmah hian Internet Cable leh TV Cable Connection hrui hman lai te chu felfai tak a thliar hrang a, Service Provider ten an mahni hrui theuh te chu colour (rawng pek tawh sa) chhinchhiahna hruia tawnkhawm tura ruahmanna siam a ni a. September ni 15 ral hmain Service Provider-te leh vengtina khawtlang hruaitute nena hma lo la tura rel a ni . Hrui hnawk hman tawh loh la awmte chu vengtina VC ten a thei ang ang a lo senghawi tura ruahmanna siam a ni bawk.
Vengtina Cable hrui inzam hnawkte tawnfel hun tur Time-Table pawh District Urban Development Officer (DUDO) ruahmanna hnuaia kalpui tura rel a ni. He hunah hian Sawrkar Official te, Kolasib khawpui huamchhunga VCP te, TV Cable Provider te leh Internet Service Provider te an kalkhawm a ni.
