Kolasibah dajgua tribal empowerment campaign deputy speaker in vailiam
Tukin zing khan Kolasib DC kawtzawl ah Kolasib District chhung atana DAJGUA (Dharti Aaba Janjatiya Gram Utkarsh Abhiyan) tribal empowerment campaign chu Pu Lalfamkima, Deputy Speaker , Mizoram Legislative Assembly in vailiamna hun a hmang a. He hunah hian Kolasib District a Dajgua Campaign atana Line Department aiawh thahnem tak an tel a ni. DAJGUA Vailiamna puala hun tawi hmanna ahhian Deputy Speaker, Pu Lalfamkima chuan thu sawiin, Sorkar in tribal te hmasawnna tur atan hma a la chho zel a ni, tiin mipuite tan an kawtkai ngeia an mamawh te lam theihna hun tur ruahmmanna a awm chu a lawmawm takzet a ni, a ti. Kolasib District ah ngei pawh Tribal te hmasawnna turin sawrkarin hmalakna a neih belh zel a ni tiin, Tribal development Agency building pawh a ram te tihfel vek tawh niin, a hna bultan mai theihin a awm a ni, a ti a, social welfare atangin old age home hmunhma tur pawh ngaihtuah mek a ni, a ti bawk.Pu Lalfamkima chuan DAJGUA a IEC in a kentel education chu a ngaih pawimawh thu sawiin sawrkar hmalakna hranghrangte inzirtir zel kan mamawh a ni, a ti a.
Hemi piahlamah hian Kolasib District bikah zirna an ngaih pawimawh a tul thu sawiin, zirna lamah thalaite an tuihal tawk lo emawni aw a tih chang a awm thin a ni, a ti a. Helamah hian tan kan lak a pawimawh takzet a ni, tiin, amah ngei pawh in Kolasib District chhunga school te a theih ang anga tlawh kual vek a tum thu a sawi bawk. Tukin zinga DAJGUA vailiamna hun hi Kolasib DC Pu Robert C Lalhmangaiha chuan kaihruaiin, DAJGUA IEC campaign chu mitin in hlawkna an chan theuh theihna turin kalchhuak turte theihtawp a tan la turin a fuih a. Sawrkarin Department angin hna tamtak kan thawk a, amaherawhchu heng hna kan thawhte hi mipuite a thleng phak em tia kan ngaihtuah a pawimawh a ni tiin, Department hnathawh hrang hrangte pholan leh chhawpchhuah a ni thei tur chu a lawmawm takzet a ni, a ti bawk.
DAJGUA (Dharti Aaba Janjatiya Gram Utkarsh Abhiyan) hi India sawrkar ,Ministry of Tribal Affairs kaihhruaina hnuaia tribal community te tana hmasawnna huapzo leh nghet zawk a thlen theihna tura hmalakna lian tak a ni a. He programme hmang hian tribal area-a hmasawnna ruhrel, hriselna, zirna, leh eizawnna lama inthlauhna zau takte sawr zim tum a ni. DAJGUA hian Sawrkar ministry hrang hrang 17-te thawhhona, specific intervention 25 a huam a, state tin leh Union Territory-a khaw 63,000 chuangah tribal mipuite hnena direct-a hamṭhatna leh service hrang hrang pekna tur hmanrua a ni a, tribal mi mtd 50 chuangten an hlawkpui thei dawn a ni. DAJGUA in a ken tel thil pawimawh tak chu ram pum huapa “Awareness and Benefit Saturation Campaign” a ni a, June 15-30, 2025 chhung hian tribal community-te’n Aadhaar card, ration card, health card (Ayushman Bharat), immunization support, bank account te leh pension scheme hrang hrangte an dawn theih nan khaw hrang hrang a camp buatsaih tum a ni. Kolasibah chuan he campaign hi June ni 25-27 chhungin khaw 12 thlan chhuah ah line Department ten an kalpui dawn a ni.
