Kolasibah 19th National Statistics Day hmang
Vawiin khan District Research Office ,Kolasib chuan 19th National Statistics Day pualin DRO Conference Hall ah hun an hmang a. He hunah hian Pi B Malsawmtluangi, Kolasib Adll DC chu Khuallian a ni a, Pu David A Lalhmingchhuana, DIPRO chu Khualzahawm niin DRO staff te leh RBD Kolasib chhunga mi te an kalkhawm a ni.
He hunah hian Khuallian , Pi B Malsawmtluangi chuan thu sawiin, District research office pawimawhna te a sawilang a. An statistics leh data lakkhawmte chu Department hrang hrang tan a tangkai em em a, sawrkar in budget a siam pawh in a kum kalta a data tamtak a mamawh thin a, hmasawnna hna thawh dawn pawhin thlen chin kan hriat angai thin a ni, a ti. DRO chu office dang angin pawisa leh works lam an khawih tam loh avangin mipui nawlpui ten an hmelhriat tawklo a, amaherawhchu Sawrkar Department leh mipuite tana Department pawimawh em em anni thung si a ni, a ti.
Khualzahawm, Pu David A Lalhmingchhuana, DIPRO Kolasib pawhin thu sawiin, DRO leh Economic & Statistics Department hmalakna liantham deuh deuh nia a ngaih te a tarlang a. Statistics pawimawh zia sawiin, heng an data lakkhawmte hi uluk tak leh rintlak taka siam chho zel a, hei aia chak zawka an kal leh zel theih nan duhsakna a hlan bawk a ni.
Vawiin hun hi Pi Mimi Lalramchhani Sailo in a kaihruaia, Pi Agnes Lalremruati, DPA hnen atangin National Statistics day chungchang leh statistics day chu Prof. Prasanta Chandra Mahalanobis piancham a nih thute leh Statistics Day tak June ni 29 chu Sunday a nih a vanga vawiina hmang annih thute ngaihthlak niin, Pi LP Vanlalruatfelin lawmthu sawina a neih zawhin vawiin hun hi tihtawp a ni.
