KOLASIB AH JANJATIYA GAURAV DIWAS KHARNA HUN HMANG
Vawiin khan Kolasib District Bawrhsap Pisa kawtzawlah Janjatiya Gaurav Diwas kharna pualin hun hman a ni a, he hun hi Pi B. Malsawmtluangi, Addl. DC, Kolasib chuan a kaihruai.He hunah hian Pu Robert C. Lalhmangaiha, District Bawrhsap, Kolasib chuan thu sawiin, Janjatiya Gaurav Diwas an hmang thei chu lawmawm a tih thu a sawi a. Pu Birsa Munda-in India zalenna sualna kawnga a thawh hlawk zia te leh India Sorkar-in hnam hnuaihnung zalenna sualtute a ngaihsan zia a sawi. Mizoram pawhin zalenna sualtu huaisen Lalnu Ropuiliani leh mi ropui tak tak te an nei ve a ni tih hre reng turin kalkhawmte chu a chah bawk.
Pu Robert C. Lalhmangaiha chuan British hunlaia Mizo lalte, a bikin Pu Lalngura Sailo (Sentlang Lal), Pu Liankunga Sailo (Mualvum Lal) leh Pu Thanghulha Sailo te’n huaisen taka British sorkar an dodal dante leh an chanchin tawi te a sawi lang a.Zalenna hlut zia sawi zuiin, zalenna chu mahni intodelh leh mahni kea dinna bul a nih thu a sawi a.He hunah hian Pu Isaac Malsawmtluanga, SDC, Kolasib chuan lawmthu sawina hun a hmang a. Kolasib-a sorkar office hrang hrang atanga aiawhte leh mipuite he hun hmang tur hian an kalkhawm a ni.
India ram-in zalenna a sualchhuahna kawnga hnam hnuaihnung (tribal) pasalthate sulhnu hriatrengna leh anmahni chawimawina ni atan, ‘Janjatiya Gaurav Diwas’ hi hman thin a ni a. Kumin 2025 hi Pu Birsa Munda piancham vawi 150-na tlinna ‘Janjatiya Gaurav Varsh’ niin, November ni 1 atanga ni 15 chhung ‘Janjatiya Gaurav Pakhwada’ (fortnight) atan hman mek a ni.Pu Birsa Munda hi British sorkar laka India zalenna sualtu, hnam hnuaihnung (tribal) te tana ‘Dharti Abba’ (Father of the Earth) tia koh hial khawpa hruaitu ropui leh huaisen a ni a. Kum 1899-1900 vel khan ‘Ulgulan’ (Great Tumult) movement a lo kalpui tawh a ni.Kolasibah pawh vawiina a kharna neih hma hian School of Nursing Thingdawl te leh DIET Kolasibah te hun hman a ni a. Hmun hrang hrangah Tribal themthiamna leh an kutchhuakte pholan a ni bawk.
