Khawzawlah sawhthing lei kharna hun hmang; district zinga sawhthing lei hnem ber an ni
Vawiin khan District Agriculture Marketing Committee (DAMC), Khawzawl hmalaknaa Sawhthing lei runpui kharna chu vawiin chawhnu dar 2:00 khan Khawzawl DC Auditorium-ah neih a ni a, Asst. District Agriculture Officer Pu Lalrammuana’n hun a kaihruai. He hunah hian District Bawrhsap Pu K. Vanlalthiana chuan thu sawiin, Khawzawl District-ah DAMC hmalaknaa loneitute thar chhuah Sawhthing lei runpui, hlawhtling tak leh harsatna awm lova zawhfel a ni ta chu lawmawm a tih thu a sawi a. He hlawhtlinna hi a buaipuituten tha taka an mawhphurhna an hlen chhuah vang leh thawhhona tha tak an neih vang a ni tiin nakin zelah pawh thawhhona tha tak neih zui zel a pawimawh tih a sawi.
DAMC Member Secretary leh District Agriculture Officer ni bawk Pi Lallawmzuali’n he huna a tarlan danin, Khawzawl District-ah kumin February ni 20 atanga tun thla July ni 3 thleng khan Sawhthing hi lei a ni a. Khawzawl District-ah hian Sawhthing leina hmun Secondary Collection Centre hi Khawzawl, Khawhai, Puilo, Rabung, Chawngtlai, Sialhawk bakah Zawlnghak Farmers Producer Company-ah te siam a ni a. Sawhthing hi kg 46,91,036 lei a ni a, district zinga lei hnem ber a ni. Sawhthing hi loneitute hnen atangin kg 1 ₹50 zelin an leisak a. Sawhthing leituten an lei ngamna zat atanga ₹50 tlinna tura sum sen ngai chu Sawrkarin a tum ve thung a ni.
Vawiin hun hmanah hian Addl. DC Pu Lalfakzuala, BDO Pu Timothy R. Lalhmangaiha leh DFDO Pu Zohmingthanga te pawhin thu an sawi a ni.
