Iprp&s minister-in agartala mizo welfare association hruaitute kawmin thilpek a pe
Vawiin khan Tripura tlawha zin mek IPRP&S Minister Pu B. Lalchhanzova’n Agartala Mizo Welfare Association hotute kawmin an mamawh leh harsatnate a ngaihthlaksak a, tangkafai cheng 5000 bakah, hnam dangte kara mizo hnam chawinun nan, zo thuam Hmaram leh Ngotekherh set 2 a pe bawk.
IPRP&S Minister chuan Mizoram pawna cheng zofate chu him tak leh thlamuang taka an awm a duh thu sawiin ngaihven reng an nih thu a sawi a. Intlawhpawhna tha zawk a awm theihna tur te, Agartala-Aizawl mai bakah Zampui tlangdung, Kanhmun leh Mizoram ri-a awm khaw hrang hrangte tan pawh Sumo service tha zawk a awm theihna turtea hma lak a nih thu sawiin Lengpui leh Agartala inkarah pawh thlawhtheihna service (direct flight) a awm leh theih nan Ministry of Civil Aviation, govt. of India-ah dilna theh luh mek a nih thu a sawi bawk.
Pu Gospel Lalthangmawia, Assistant Secretary, AMWA chuan Agartala Mizo Welfare Association aiawhin thilpek hi a dawng a; hmun hrang hrang atanga zirna, eizawnna leh thil dang avanga Tripura khawpuia awmte duh leh mamawhte ngaihtuahsak thin an nih avangin Mizoram sawrkar chungah lawmthu a sawi a ni.
