India rama nausen thi tlemna ber State zingah Mizoram a lang
Sample Registration System (SRS) Bulletin, Registrar General of India-in a tih chhuah thar ber (May 2025) in a tarlan danin India ram states leh UT te zingah Mizorama Nausen thihna rate, Infant Mortality Rate (IMR) chu 4 niin, India ramah Mizoram chu hniam ber nihna hauh state 3 zingah a tel a. Mizoram bakah hian Manipur leh Sikkim te chu an lang ve bawk a ni.
Pi Lalrinpuii, Health Minister chuan hetianga state lian zawkte leh changtlung zawk daihte kara IMR a Mizoramin pakhatna dinhmun kan la hauh thei hi thil lawmawm tak a ni a, hei hian hriselna kawngah Mizoram chuan hma a sawn zel tih a entir a ni a ti a. Hemi atana rim taka thawktu zawng zawng – Health department pumpui bakah a programme anga enkawltu National Health Mission, Mizoram leh RCH Programme te, line departments – Women & Child Development Dept, Social Welfare Dept, School Education dept, Rural Developement dept, PHE Dept leh department dang dang IMR hniam theih nana nasa taka hmalatute zawng zawng chungah lawmthu a sawi nghal bawk a ni.
IMR hi nausen dama piang sang khat zela nausen kum khat hnuailam thi zat (infant deaths per thousand live births) tihna niin, IMR 4 hi a țha hle a, India ram pum IMR chu 27 a ni. Tun țum SRS data hi 2021 data hmanga siam a ni. IMR hniam tur hian Health system pumpui a țhat a ngaih avangin mithiamte chuan IMR hniam hi khawvel pumpuiah hriselna lam kawnga hma kan sawn leh sawn loh tehna pawimawh berte zingah an hmang thin a ni.
