ICT MINISTER IN AI LANGUAGE APP BHASHINI CHUNGCHANG WORKSHOP A HMANPUI
ICT Minister Dr. Vanlalthlana chuan vawiin khan ATI Auditorium-ah ni khat awh tur BHASHANI app chungchang inzirtirna “BHASHINI Rajyam Workshop: Mizoram Chapter” chu a hawng. He workshop hi Sorkar laipuia Ministry of Electronics and Information Technology (MeitY) hnuaia awm Digital India BHASHINI Division (DIBD) leh Mizoram Sorkar ICT Department, tangkawp buatsaih a ni. Minister hian Mizo Language Hackathon chu a tlangzarh bawk a ni.
BHASHINI app (Bhashini Language Translator tia hriat bawk) hi AI (Artificial Intelligence) behchhan mobile application a ni a. India ram tawng hrang hrangte mahni tawng hriatthiam a lehlin theihna app niin, hei hian tawng hrang hman avang inbiakpawhna lama harsatna awm thin a sutkian beisei a ni. Voice-to-text, text-to-voice, leh text-to-text conversion te a support a ni. Mizoram Sorkar leh DIBD chuan June ni 18, 2025 khan thawhdunna thuthlung lo ziak tawhin, BHASHINI chu Mizorama tangkai taka hman a nih theih nan state chhunga tawng hrang hrang te pawh AI khawl hi zirtir tura ruahman a ni.
Khuallian Minister Dr. Vanlalthlana chuan khawvel hmasawnna kal zelah AI thiamna chu mellung pawimawh tak niin, tangkai taka kan hman thiam pawimawh a tih thu a sawi a. BHASHINI app tangkai theih dan tur hrang hrang sawiin, mahni tawng hmangin state pawn a mi te hnenah kan ram chanchin kan saiw pawh an hrethiam vek theih tawh tur a sawi a. Mipui hamthatna tura Sorkarin Digital Service hrang hrang a chhawpchhuah thin te pawh tawng hriatthiam loh avanga a chhawrtu tur ten an bawhzui ngam loh thin kha tunah chuan a awlsam phah tawh tur thu a sawi a. Workshop chhimtute chu midang tana hrilhhretu pawimawh an nih chhoh zel dawn avangin hun hlawkthlak tak an hman a beisei thu a chah bawk.
ICT Secretary Pu Amit Sharma chuan digital khawvelah Mizoramin hmasawnna nasa tak a hmu dawn nia a hriat thu sawiin, tawng thiam inanglo avanga inbiakpawh theihlohna (language barrier) chu hmasawnna daltu pakhat a nih theih thu sawiin, Mizoram chhung tawng hrang hrang huam tel thei tura BHASHINI app siam a nit a chu lawmawm a tih thu a sawi.
Digital India BHASHINI Division CEO Pu Amitabh Nag hnen atangin BHASHINI App siamchhuah a nih dan te, a thil tih theih leh hmabak la awmte ngaihthlak a ni a. AI chu tawng (language) la zirtir (train) chunzawm zel ngai a nih thu te, hmangtu an tam poh leh AI hriatna a tam belh a, a changkan zel thu a sawi.
Vawiin Workshop buatsaihah hian Mizo Language Hackathon atana hmalakna tur te, BHASHINI hnuaia hmanrua hrang hrang zirhona te neih niin, Mitra Programme (MITRA), Bhashini Samudaye leh Bhashadaan live demonstration te neih a ni. Workshop-ah hian Mizoram-a BHASHINI’s technology hmang tura department hrang hrang ten roadmap an siam dan tur sawihonate neih a ni a. Capacity-building session-ah hian state official leh technical team-te chu an huapzo leh awmze nei zawka hna an thawh theih nan AI tools hmanga an thuam an tihchak theih thu te sawi a ni.
