HOME MINISTER-I’N RUIHHLO DO BEIHPUI THLAKNA KHUH HAWNG
Home Minister Pu K. Sapdanga’n vawiin khan a pisaah Mizorama ruihhlo do beihpui thlakna tur khuh hawnna a nei. He hunah hian Excose & Narcptics Minister Pu Lalnghinglova Hmar, Home Department Secretary, IGP (L&0), Aizawl DC leh SP bakah Excise & narcotics leh Polkicve hotu pawimawhte an tel a, Central YMA hruaitute pawh an tel a ni.
Home Minister chuan Mizoramah ruihhlo a hluarin ruihhlo in nasa takin min tibuai mek a. Ruihhlo hluar hian kan khawtlangah harsatna tamtak min thlen mek avangin ruihhlo hluar do let tur hian Mizoram Sorkar leh CYMA te chuan theihtawp an chhuah reng a. Chutih rual chuan awmze nei lehzual a ruihhlo dona kawnga hmalak a nih theih nan Mizoram Sorkar chuan ngaihtuahna nasa takin a seng a ni a ti a. Ruihhlo laka kan ram a him theihnan September,2025 atanga December, 2025 chhung hian Mizoram-ah Ruihhlo Dona Beihpui (Operation Against Trafficking and Use of Drugs and Narcotics in Mizoram) kalpui tum a nih angin vawiin September ni 1, 2025 hian a khuhhawnna (launching programme) hun hman a nih thu a sawi a ni.
August ni 7, 2025 khan Mizoram Sorkar a Home Department, Mizoram Excise & Narcotics Department, Mizoram Police, SIB te leh CYMA hruaituten awmze nei leh zuala ruihhlo do anih theihnan meeting neiin uluk taka sawihona leh inrawnna neih a ni a. He meeting-ah hian Mizorama ruihhlo lo lut te hi Burma lam atangin a hlawmin a rawn lut a, chung a rawn luhna hmun 22 (sawmhnih pahnih) te pawh tarlan a ni.
