Home minister-i’n mobile forensic vehicle 10 vailiam
Home Minister Pu K. Sapdanga’n vawiin tlai dar 4:00 khan Directorate of Forensic Science Laboratory kawt zawlah Mobile Forensic Vehicle 10, sorkar laipuiin Rs. 4.818 Crore lai maia a leisak chu flag-off na hun a hmang. He motor hi motor satliah ni lovin a chhungah hian forensic evidence pawimawh hrang hrang lakkhawmna tur hmanraw pawimawh tak tak a awm a ni. Heng motor 10 leina atana Rs. 4.818 Crore hi kumin August thla khan pek tlak tawh a ni.
July ni 1, 2024 atangaIndia ram puma hman tan tak Criminal Law thar Bharatiya Nagarik Suraksha Sanhita, (BNSS) 2023 hian Forensic lam hnuchhuina a dah pawimawh hle mai a. Dan tharah kum 7 chin chunglam hrem theihna reng reng eng pawi khawihnaah pawh Forensic expert in a endik a ngai a ti a. Forensic lamin an tih tur a hun taka an tih chat chat theih nan Sorkar laipui chuan State/UT tin FSL tih changtlunna turin khawl pawimawh leina tur (Machineries & Equipment) leh pawikhawihna hmun thlen zung zung theihna tur Mobile Forensic Vehicle (MFV) leina tur sum a ruahman sak a. Mizoram FSL pawh khawl pawimawh 15 leina tur Rs. 6.13 Crore leh Mobile Forensic Vehicle 10 leina tur a rawn pe a ni.
Tun dinhmunah hian Directorate of Forensic Science Laboratory, Mizoram New Capital Complex hnuaiah District Mobile Forensic Unit, Aizawl, Lunglei leh Champhaiah hawn a ni a, thawktu tur mithiamte pawh lak thuai an ni ang a, district dangah pawh hawn belh zel tura hmalak a ni ang.
Home Minister chuan India ram hi forensic field ah na na na chuan khawvelah hnuhma nei hmasa pawl kan ni a, kum 2012 a Delhi gangrape case lar tak ‘Nirbhaya Case’ atang khan nasa takin a thangharh a ni a ti a. India rama hnuchhuina kawnga forensic thiamna a pawimawhzia leh tih changtlun a tulzia a hre chho lehzual a. Hemi atang hian India chuan forensic lamah Chapter thar pawimawh tak a kai chho zui ta tih sawiin, Mizoram Forensic Science Lalboratory pawh hian India ramah hmahruaina neiin, case exam chhung rei lo ber, paperless a kal hmasa ber leh case tracking system nei hmasa ber a ni mek chu chhuanawm a tih thu a sawi bawk.
Tunah hian Director Pu T. Lalropuia hovin expert 14 an awm mek a. Anni hian pawikhawihna hmun a awmin Mizoram hmun hrang hrangah an kal thin a, laboratory ah an exam leh a, law court ah expert testimony pein an tul hle. Mizorama case lian tam takah Mizoram Police te nen thawk hovin rorelna dik a thlen theihna turin theihtawp an chhuah rah tam tak kan hmu tawh a ni.
