HEALTH MINISTER PI LALRINPUII’N SCHOOL OF NURSING THINGDAWLAH 7TH CAPPING & LAMP LIGHTING CEREMONY LEH GRADUATION A HMANPUI
Vawiin khan School of Nursing, Thingdawl chuan an school auditorium-ah 7th Capping & Lamp Lighting Ceremony leh Graduation Programme ropui takin an hmang a. He hun hi Pi Lalrinpuii, Minister, Health & Family Welfare Department chuan Khuallian niin a hmanpui. Health Minister Pi Lalrinpuii chuan zirlai chhuak turte leh Capping ceremony hmangtu zirlai tharte hnenah lawmpuina leh duhsakna a hlan a. Zirlaite chu an hmaah tihtur tam tak an nei tih sawiin, Nurse hna chu hna zahawm leh ropui tak, midangte tana rawngbawlna hna pawimawh tak a ni, a ti.
Minister chuan sawi zelin, tunlai hunah hriselna kawngah hmasawnna tam tak a awm a, chungah chuan Nurse-te chu engkima engkim, hmun pawimawh tak changtu an ni a ti. Amaherawhchu, chu an pawimawhna chuan mawhphurhna lian tak a keng tel a ni tiin, inthlahdah lo turin a chah . Nursing profession tihchangtlun (upgrade) nan sawrkarin kawng hrang hrangin hma a la mek a, hna tam tak computerised a nih theih nan ngaihtuahna sen mek a ni, a ti bawk.Pi Lalrinpuii chuan Nurse-te’n ramdanga hna an hmuh zung zung theih nan tawng zirna kawngah Mizoram Youth Commission (MYC) nen tangkawpa hmalak tum a ni, a ti a. Zirlaite chu Mizoram pawn mai ni lo, foreign thlenga hnathawk ngam tur leh ruihhlo laka fihlim tlat turin a chah bawk.
He hunah hian Pi Laltanpuii, Principal, School of Nursing Thingdawl (SONT) in report a pe a. Vawiina Graduation hmang mek te hi Batch 6-na niin zirlai 17 an ni a, Capping Ceremony hmangtu zirlai thar mi 20 an awm bawk a ni.Programme hman chhung hian zirlai ti tha te hnenah lawmpuina thilpek hlan a ni a, zirlaite atangin item hrang hrang hmuhnawm tak tak entir a ni bawk. Pi Lalthlamuani, Tutor in lawmthu sawina a neih hnuin hun tihtawp a ni.
