Health minister-in mfm school of nursing hnuaia gnm leh anm zir turte capping and lamplighting hun a hmanpui
Vawiin khan Health & Family Welfare Minister Pi Lalrinpuii chuan MFM School of Nursing-in 16th ANM & 1st GNM Capping & Lighting Ceremony, MFM School of Nursing Auditorium, Durtlang North-a an buatsaih chu Khuallian niin a hmanpui.
Kalkhawmte hmaah hian khuallian Health Minister Pi Lalrinpuii chuan Nurse zirturte fuihna thu sawiin, Nurse chu eizawnna zahawm tak a nih dante a sawi a. Mipuite hriselna tihhmasawnna tur chuan nurse-te chu a pawimawh berte zinga mi an nih avanga inpekna tak tak nena nursing hna chu thawk tura chahin, Sawrkar pawhin Nurse-te chu a ngaih pawimawh hle thu a sawi a. Mipui vantlang tana tha zawk tur chin dan tha leh thil tharte ngaihtuah chhuah tum fo tura fuihin, hlutna a pun poh leh mawhphurhna pawh a sang ve zel tih hre turin a chah a. Nurse zir turte chu nursing kaldan phung pangngai piah lamah hmasawn theih dan tur kawng ngaihtuah fo zawk tura chahin, ram pawn thlenga MFM a zirlaite hnathawka an awm thinte chu ram tan pawha chuanawm tak zet ni a a hriat thu a sawi a. Ruihhlo leh mipat hmeichhiat hman khawlohna dona kawngah Nurse-te chu awareness nei tha ber leh mipuite hnena hrilhhriat kawnga thawh hlawk ber theitu an ni tih hre reng a, theihtawp chhuaha tanpui turin a sawm a ni.
Vawiina hun hman hi Miss Vanlalrindiki chuan a kaihruai a. Nl Lalthakimi, Board Member, MFM chuan kalkhawmte lawmna thu sawiin, MFM School Of Nursing Choir -te chuan hun hawnna hla mawi tak an rem a. Miss Christina B. Lalhmingliani, Senior Tutor, MFM School of Nursing chuan school report pein, Pi Lalrinpari, Nursing Superintendent, MCSI, Zemabawk-in zirlaite lukhum khumtir leh khawnvar chhitna hun (Capping and lamp lighting) a hmang a. Hemi zawh hian Upa R. Laltluanga, Durtlang chuan zirlaite hlanna malsawm tawngtai a neihsak nghal a. Upa R. Vanlalzauva, Founder, Director, MFM-in lawmthu sawiin hun hi a khar a ni.
