HEALTH MINISTER-IN ‘3 DAY REGIONAL REVIEW MEETING ON MALARIA ELIMINATION FOR GFATM PROJECT STATES’ HAWNNA HUN A HMANPUI
Health & Family Welfare Minister Pi Lalrinpuii chuan vawiin khan Assembly Annex Building Conference Hall-a National Vector Borne Disease Control Programme (NVBDCP), Health & Family Welfare Department buatsaih, ni thum awh tur, ‘3 Day Regional Review Meeting on Malaria Elimination for GFATM Project States’ hawnna hun chu khuallian niin a hmanpui.Khuallian Pi Lalrinpuii chuan hmun hrang hrang atanga meeting chhimtute lawmin, he review meeting hi Mizoramin vawi 5 a thlenna a nih thu a sawi a. Mizoram chu India rama malaria vei awm tamna ber a nih avangin tihrem kawngah tha thara beih a ngaih thu sawiin, Mizorama district 4 te chu Category 3 – High Endemic an la nih thu leh malaria vei tharte zinga zaa 80 dawn chu he’ng district atanga hmuhchhuah an nih thu a sawi a. Inhrilhhriatna tha neih leh invenna a pawimawh tih a sawi a ni.
Health Minister chuan nikum aiin kuminah malaria kai leh thihpui tlem deuh mah se hmun dang nena khaikhin chuan ngaihmawh tham a la ni, a ti a. Malaria natna do kawnga hmatawng tur, health worker 100 lak tum mek a nih thu sawiin, malaria do kawnga sawrkar hmalaknate a tarlang a. He natna do tur hian khawtlang leh NGO-te nena tanrual a ngai a ni, tiin, he meeting kaltlang hian kan ram thlen chin enfiah a nih a, malaria natna nuai bo dan tur tha zawk leh chak zawk duan a nih theih nan duhsakna a hlan a ni.Pu H. Lalengmawia, IAS, Health Commissioner & Secretary pawhin thu sawiin sawrkarin healthcare sector chu a ngai pawimawh hle a ni, a ti a. Sawrkar chuan thawktu, hmanrua, leh hotu lamah he sector hi thuam thain, mumal zawkin transfer and posting mai bakah MUHCS a kalpui bawk tih kalkhawmte chu a hrilh a. He review meeting hian malaria do kawnga Mizoram thlen chin a zirchian a, tan lak dan tur a duan chhuah a beisei thu a sawi a ni.
Hawnna hunah hian Dr. Lily Chhakchhuak, Mission Director, NHM chuan kalkhawmte lawmna thuchah a sawi a. Dr. Pranab Jyoti Bhuyan, Addl. Director, NCVBDC chuan he Regional Review Meeting thil tumte sawiin, Global Fund hnuaia hnathawhte enlet leh High Endemic District-te tana hmalak dan tur ruangam duan an tum ber thu a sawi a. Malaria chungchanga Mizoram dinhmun a tarlang bawk a. Dr. Vanlalfela, Director of Health Services chuan lawmthu sawiin hun a khar a ni.
