Haulawngah Project LEAP hnuaiah vohbikte tan health assessment camp buatsaih a ni
Lunglei District Administration hma laknaa Lunglei District-a vohbikte chawi kanna tur ruahmanna – Project LEAP (Lunglei’s Empowerment for Access and Equity for all Persons) hnuaiah nimin khan Primary Health Centre (PHC), Haulawngah vohbikte tana hriselna dinhmun endikna, health assessment camp buatsaih a ni. He hunah hian Sub-Deputy Commissioner Pi Lalnunchhani Hnamte chuan Project LEAP chu Bawrhsapin a ngaih pawimawh thu sawiin, vohbikte’n hamṭhatna an dawn tur ang an dawn theihna tura camp buatsaih chu hmang ṭangkai ṭheuh turin kal khawmte a chah a. Khaw chhehvel aṭanga kalte chu an veivahna senso sum leh pai a hlan nghal bawk.
Project LEAP hnuaia health assesment camp buatsaih hi PHC Haulawnga Medical Officer (Ayush) Dr PC Lalrinmawii chuan lo dawngsawngin, Civil Hospital Lunglei aṭangin Dr Joseph Lalrindika Chawngthu, Sr Speciallist (Ortho); Dr Jimmy Lalnunpuia, Sr Medical Officer (ENT); Pi Rachel Malsawmkimi, Audiologist; Pu Challiandinga, Clinical Psychologist leh Pi Lalrempuii, Opthalmic Assistant te chuan he camp pantute hi an endik a. Mi 48 inentirin, chu’ng zinga mi 38 te chu Unique Disability Identity (UDID) card nei thei tura nemngheh (certify) an ni.
Nimin a health assesment camp-a UDID siam thei tura nemnghehte chu, Haulawng aṭangin mi 21, Ramlaitui aṭangin mi 4, Mausen aṭangin mi 1, Hmuntlang aṭangin mi 1, Zotuitlang aṭangin mi 3, Mualṭhuam North aṭangin mi 5 leh Sekhum aṭangin mi 3 te an ni. He hunah hian inentir tura kalte chu Healthy Lunglei District Campaign hnuaiah PHC Haulawnga thawktute’n natna inkai chhawn theih loh (non-communicable disease) – zunthlum leh thisensang an neih leh neih lo an lo endik nghal bawk a ni.
