Green Mizoram Day 2025 pualin Governor leh Lady Governor te’n State Tree Herhse tiak an phun
Mizoram hmun dangte rualin tukin khan Raj Bhavan-ah Green Mizoram Day, 2025 puala hun hman a ni a. He hunah hian Governor, General (Dr) Vijay Kumar Singh, PVSM, AVSM, YSM (Retd) leh Lady Governor Pi Bharti Singh te chuan Upper Lawn, Raj Bhavan-ah Mizoram State Tree, Herhse tiak an phun.
He hunah hian Governor General (Dr) Vijay Kumar Singh (Retd) chuan Raj Bhavan-a Green Mizoram Day, 2025 hman a nih theih nana Environment, Forests & Climate Change (EF&CC) Department-te hmalakna fakawm tiin, he hun hmang tura kalkhawm zawng zawngte chungah lawmthu a sawi a. Mizoram chu hmun dangte ngaihtuaha hmun hring tamna leh thing leh mau pawh engemawzah awmna ni mah se, khawvel pumah sik leh sa a inthlak danglam nasat avangin hemi lo do let tur hian uar zawka thingphun beihpui thlak zel a tul a ni, a ti a. Mizoram puma Green Mizoram Day hmangtute duhsakna hlanin, Mizoram mipuite chu thing phun leh enkawl zui kawngah theihtawp chhuah turin a chah a ni.
Tukin Raj Bhavan-a Green Mizoram Day puala hun hmanah hian Pu Ajit Roy, Secretary to the Governor, Pi Arti Choudhary, Chief Conservator of Forests, Pu Lalnunsanga Khawlhring, Divisional Forest Officer, Aizawl Forest Division-te bakah Raj Bhavan leh EF&CC Department thawktute an tel a ni.
