Global Iodine Deficiency Disorders Prevention Day hlawhtling taka hman a ni – District 2 atangin awrpuar 2.64% hmuhchhuah a ni
Vawiin khan Health Workers’ Training School, Kulikawn-ah “Global Iodine Deficiency Disorders Prevention Day” hman a ni a, Dr. Lily Chhakchhuak, Mission Director, National Health Mission chuan khuallian niin a hmanpui a, Health Worker Training lai Student thahnem tak an tel.Khuallian Dr. Lily Chhakchhuak, Mission Director, NHM chuan he day in a tum ber chu India ram pumpui-ah Iodine tlakchham avanga harsatna tam tak awm theite dona beihpui thlakna a nih thu a sawi a. Mizoram-ah Iodine tlakchham avanga Awrpuar tunhma lama a tam thin thu sawiin, a tam zualna khua-ah phei chuan Patling 10 thukhawm zingah Awrpuar 11 vel an awm an tih fiamthu thin thu te leh India Sawrkarin NIDDCP programme a rawn siam hnua Iodine tel lohna chi (salt) zawrh a khap atanga thawktu ten theihtawp an chhuahna a zarah Awrpuar an tlem tak thu te a sawiin lawmawm a tih thu a sawi a.
Dr. Lily chuan Sawrkar laipui order siam angin Mizoram-ah Iodine tlakchham hriatna langsar ber Awrpuar Survey neih a nih thin thu te, Survey hmasa ber Kum 1978 ah neih niin hemi ah hian Awrpuar 69% hmuhchhuah a nih thu a sawi a. National Family Health Survey 2013-14 ah chuan mizoramah Awrpuar 6.65% vel kan la awm thu leh Kum 2019-21-a NFHS-5 ah chuan National Goal 5% aia hniam 0.376% kan nih tawh thu te a sawi a. Hemi kawnga theihtawp chhuah tu Programme Officer te leh Staff zawng zawng te chungah lawmthu a sawi bawk a. Mipuite kan hrisel zawk nan Iodine telna chi chauh ei uar turin a chah bawk.Dr. Nathan Vanlalhruaizela, Technical Officer, NIDDCP in Powerpoint Presentation hmangin Iodine nihphung te sawifiah in Iodine tlakchhamna avangin Mihring taksa leh rilru-ah harsatna chi hrang hrang siamthat theih tawh loh a thlen thin thu sawiin Nauchhiat, thla kim lova nau hrin, hlamzuih, nau thisa a piang, pianphunga rualban lohna hrang hrang tawngtheilo, bengngawng, mitkalh, rilru kimlo leh chaklo, lehkha thiam theilo, sawngnawi, fuke tawi te a awm tir theih thu a sawi bawk.
Global Iodine Deficiency Disorders Prevention Day hmanna programme hi Dr. Lalawmpuia Chhangte, State Programme Officer, NIDDCP, NHM in kaihhruaiin Prevention Day hman a nih dan sawifiahin kalkhawm te lawmna thu a sawi a, Iodine tlakchham avanga natna leh harsatna chi hrang hrang awm thei te theihtawp chhuaha umbo a nih zel tur thu a sawi a. Iodine tlakchhamna avanga harsatna mipui ten kan tawh zel lohnan sawrkarin theihtawp a chhuah a, Survey te neiin Chi sample tam tak test reng a nih thu leh Test kit pawh sawrkarin a thlawnin Facilities hrang hrangte hman turin a semchhuah thu leh Programme hmalakna hrang hrang te a sawifiah a. Kumin chhungin Serchhip District leh Kolasib District-ah Survey neih tawh a ni a, mi 2,990 test niin hemi atang hian awrpuar 2.64% vel hmuhchhuah niin Chi sample 134613 test tawh niin Iodine awm tur zat ang te a awm thu a sawi a, State Laboratory Chi Sample 300 test tawh a nih thu a sawi bawk.
