Forest Minister-in Saitual District chhunga Tamdil humhalh hna thawktute hnenah tanpuina a sem

Vawiin khan Interpretation Centre Tamdil, Saitual Range-ah Forest Minister Pu Lalthansanga chuan National Plan for Conservation of Aquatic Ecosystems (NCPA) hnuaia tanpuina chu Tamdil humhalh leh tihhmasawn nana thawktu chhungkaw 106 hnenah a sem chhuak.

He hunah hian Forest Minister Pu Lalthansanga chuan thu a sawi a, NCPA hnuaia Tamdil tihhmasawn kawnga hna thawktute hnena tanpuina sem a ni thei chu lawmawm a tih thu a sawi. Minister chuan Tamdil lo insiam dan mithiamte chhui dan te tarlangin, he Wetland hi fing taka enkawl a, hman tangkai a nih chuan eizawnna mi tam tak tan a siamsak thei tih a sawi a, sum tam tak a lak luh nan a hman theih dawn bawk a ni, a ti.

Minister chuan Tamdil chu humhalh a ngai hle tih a sawi a, Tamdil leh a chhehvel khuaa chengte chu an thlai chinte enkawl nan chemical tel lei tih thatna (fertilizer) leh rannung tihremna (insecticides) te hmang lo hram turin a ngen a, hei hian lei hriselna a tichhia a ni, a ti. Khuallian chuan kan ram chu kan humhalh that loh chuan a chereu mai dawn tih a sawi a, Forest department chauhin an enkawl theih loh avangin khawtlang mipuite chu enkawlpui turin a sawm bawk a ni.

Forest Minister chuan ram leilung hausakna te chu hmang thiam turin kalkhawmte a fuih a, chutih rualin mamawh bak hmang lo tur leh nungchate tichereu zawnga khawsa lo turin a chah bawk. Tamdil chu khualzin hiptu pawimawh tak a ni chho mek tih sawiin nikum lamah pawh Sangha Kutpui hlawhtling taka hman a lo ni tawh a ni, a ti a, Tamdilin hma a sawn zel theih nan leh a chhehvela thing leh nungchate humhalh a nih theih nan kalkhawmte chu theih tawp chhuah a, Forest department te thlawp zel turin a chah nghal a ni.

Tamdil enkawlna tur riruang Tamdil Wetland Conservation Plan hi kum 5 danah siam thin a ni a, he plan zulzui hian hmasawnna hna thawh thin a ni bawk. Heti ang hnathawhna atana mamawh te chu National Plan for Conservation of Aquatic Eco-System (NPCA) atanga dawn thin a ni. Tamdil tihhmasawnna tur atan leh a tuihna te a lo chak lehzual theihna tur atan a chhehvel khaw mipuite zinga thawktu (Beneficiary) chhungkaw 574 hnenah tun 2022-2026 plan chhung hian tanpuina sumfai sem chhuah a ni a. Vawiin hian Tualbung atangin chhungkaw 31, Sihfa atangin chhungkaw 30, Saitual Chawnpui atangin chhungkaw 45, a vaiin chhungkaw 106 hnenah tanpuina sumfai hi sem chhuah a ni.

Tamdil tih hmasawnna tur atan hian Forest Department mai bakah Fisheries Department te pawhin hna an thawk thin a, an hnenah hian NPCA atanga sum lo kal cheng nuaih 22.4 lai hlan a ni tawh bawk.

Vawiin hun hmanna hi Pu Rajeev Kumar Tiwari, Principal Chief Conservator of Forests, Mizoram chuan a kai hruai a, Pu NC Saravanan, Chief Conservator of Forests (Hqrs), Mizoram chuan inlawmna thu sawiin, Pu Lalthansanga, Hon’ble Minister, EF&CC Dept chuan thu a sawi bawk a ni. Technical report hi Pu M.Z. Singson, Chief Wildlife Warden, Mizoram hnen atangin ngaihthlak a ni a, Pu Lalnunsanga Khawlhring, CF (EC)& DFO, Aizawl chuan lawmthu sawinain hun a khar a ni.