Excise minister pu lalnghinglova hmar hovin excise officer-te leh vaivakawn siamtha pawl thukhawm
Vawiin khan Pu Lalnghinglova Hmar, Minister of State, Excise & Narcotics Department hovin MINECO a a office-ah Excise & Narcotics Department hotute leh Vaivakawn Siamtha Pawl hotute an thukhawm a, Vaivakawn veng chhunga ruihhlo ngai pungkhawm nasa thin then thianghlim dan tur ruahmanna an siam. Vaivakawn Siamtha Pawl report dan in Aizawl veng hrang hrang bakah khaw dang atanga ruihhlo ngaite’n Vaivakawn an pan khawm thin a. An punkhawm tam lai chuan mi 200 chuang tling thinin khawlai hmun ualau tak taka inchiu te an awm fo avangin nunau tan a him lova, rûkruk leh inrawk pungin Biak In, Anganwadi, YMA Property House bakah mimal in engemaw zat rawk a ni tawh a ni. Pawl hrang hrangin eitur an pe thin chuan ruihhlo ngai pungkhawm a tih tam phah tih sawiin, eitur pe tur chuan hriattir hmasa thin turin VSP chuan thuchhuah an siam tih an sawi bawk.
Excise & Narcotics Commissioner Pu Z. Lalhmangaiha chuan zirchianna an buatsaihah ruihhlo ngai zinga 80% vel chu mahni chenna in nei, mahse ruih duh vanga Vaivakawn leh a chhehvela kalkhawm an ni tih a sawi a. Kalkhawm thin zingah hian TBCC atanga chhuak chu 60% vel an ni a, Hulhliap Project atanga chhuak chu 5% vel niin a bak chu hmun dang atanga kalkhawm an nih thu a sawi. Department lamin theihtawp an chhuah a, tlaivar in Aizawl khawpui chhungah mobile duty an neih thin thu a sawi. Excise Minister chuan, “Kan ramah ruihhlo ngai an pung zel hi a pawi takzet a, chutiang miten Vaivakawn, Rangvamual leh a chhehvel awm khawmna hmunpuia an hmanga, Mizoram hmun hrang hrang aṭanga ruihhlo tlan tura an kal khawm hi a veiawm takzet a ni. Khawtlang nen ṭang rualin ‘A Senchi Lane’ tia an sawi pawh tihrem a ni tawh a, khawtlang nen ṭang rual bawkin ruihhlo ngaite hmunpuia an hman ṭhin hi tihrem kan tum tur a ni,” a ti a, Vaivakawn Siamṭha Pawl leh khawtlang mipuite nen ṭanho zel a duh thu a sawi.
Vawiin thukhawm chuan ruihhlo ngaite leh zu in miten an veng chu kalkhawmna leh riahkhawmna tura an ngai a, an pungkhawm thin chu tha an ti lova, nunau leh khawtlang tana a him loh avangin titawp tura thian thianghlim turin Excise & Narctics Department leh Vaivakawn Siamtha Pawl te chu thawhho nise tiin an rel a. Hmalakna hmasa atan Excise Minister chuan VSP hnenah pawisa fai cheng sing hnih a pe a ni.
