Ef&cc minister-in ‘kangmei ven hapta 2026’ a hawng
Vawiin khan Environment, Forest & Climate Change Department bultumin Kangmei Ven Hapta (Fire Prevention Week 2026) hawnna inkhawm, ATI Auditorium, MINECO-ah buatsaih a ni a, EF&CC Miniter Pu Lalthansanga’n a hawng. Kumin atana Kangmei Ven Hapta thupui chu ‘Nungcha tinreng chenna leh tui thianghlim min petu ramngawte, kangmei lakah venghim rawh’ tih niin vawiin vek hian District hrang hrangah pawh Kangmei Ven Hapta hi hman tan a ni bawk.
EF&CC Minister chuan thu sawiin ‘Kangmei Ven Hapta 2026’ chu mipuite’n kangmei laka fimkhur nachang kan hriat thar leh theuhna tur atan te, uar lehzuala invenna kalpui a nih theih nan tea hmalakna a nih thu a sawi a. ‘Record-a tarlan a nih danin Mizoram chu engtiklai pawha ram kang/kangmei chhuah thut theihna hmun a nih avangin kumtluana kangmei laka fimkhur nachang kan hriat reng a ngai a ni’ a ti a. Kangmei laka ramngawte veng him tur leh sik leh sa inthlak danglam nasa lutuk tur veng turin mipuite’n inzirtirna kan neih nasat a ngaih thu sawiin, khawpuia chengte chu hma la hmasatuah tang se a duh thu a sawi a. Sawrkar pawhin media hrang hrang kaltlanga uar lehzuala hmalak zel a tum thu sawiin, kangmei venna kawnga thawk tha khuate hnenah pawh lawmman siam a nih leh tur thu a sawi bawk.
YMA leh Environmental NGO hrang hrangten ramngaw ven him kawnga an thawhpuinaah lawmthu sawiin, hun lo awm leh zel turah pawh thawh hona tha tak neihpuiah a sawm nghal a; ramngaw ti chereu tam lo tura lo neih dan kalphung tha lehzual a awm theih nan te, hmasawnna hna thawh leh environment humhalhte pawh inkhuangrual taka kalpui a nih theih nan, Forest Department chu Prohibitory ni lova Regulatory an nih thute sawiin, Department hrang hrangte nen pawh thawh hona tha tak neih zel a pawimawh thu a sawi a. ‘Ram mipui zawng zawngte’n, he kan chenna ram humhim tur hian tangruala kan thawh ho a ngai takzet a ni’ a ti bawk.
Vawiin Kangmei Ven Hapta hawnna inkhawmah hian Ravi Horo, Additional Principal Chief Conservator of Forests (Planning) chuan kalkhawmte lawmna thu a sawi a; Principal Chief Conservator of Forests Rajeev Kumar Tiwari-an Fire Prevention Week thil tum tlangpuite a sawi bawk a; Pollution Control Board Chairman Pu Liankima Lailung kaihruaiin nungcha leh ramngaw humhalh tura thutiam lakna neih ni bawkin Department hrang hrang aiawhte bakah Environmental NGO leh YMA hruaitute he hunah hian an tel a; Lalnunsanga Khawlhring, DFO, Aizawl chuan lawmthu sawiin hun hi a khar a ni.
Kangmei Ven Hapta 2026 hi February ni 9 atanga ni 13 thleng neih tura ruahman a ni a, kangmei venna kawnga hma la thazual khaw pathumte hnenah lawmman pek an ni ang a, khaw dang ti tha pathumte hnenah consolation prize pek an ni bawk ang. Huan emaw, leipui emaw tur atana mimal ram vatte chuan March ni 5 ral hmain an hal tur a ni a, khawtlang theh ram neitute chuan March ni 15 ral hmain an lote chu an hal tur a ni. Lengpui leh a chhehvela lo hal turte chuan tlai lama thlawhtheihna thlawk chhuak leh tum hnuhnung ber hnu lamah chauh an hal tur a ni ang.
