Education minister-in race 2025 lawmman semna hun a hmanpui
Ramthar Veng Branch YMA Education Sub-Committee buatsaih, Ramthar Veng Aptitude Challenge Examination (RACE) 2025 result puanna hun Ramthar Veng Presbyterian Kohhran Hall-a neih chu School Education Minister Dr. Vanlalthlana, bialtu MLA ni bawk chuan nizan khan khuallian niin a hmanpui. Khuallian Dr. Vanlalthlana chuan mi tumruhte’n hlawhtlinna an chang thin tih sawiin, khawvel huapa mi lâr leh hmingthangte pawh hi hlawhchhamna tam tak lo nei tawh thinte an ni, a ti a. Zirlaite chu nasa taka lehkha zir tura fuihin, kawng tinrengah hlawhtling thei vek lo mahse mahni nih tumah theuh chiang turin a fuih a. Hlawhchham châng pawha beidawng mai lova, tumruhna nena theihtawp chhuah ngam thinte chu a tawpa hlawhtlinn chang thinte an nih thu a sawi bawk.
School Education Minister chuan Ramthar Veng Branch YMA-in zirna lama vengchhung hmasawnna tur ruahmanna tha tak an siam chu fakawm a tih thu sawiin, YMA in an tana hun tha tak a buatsaih sak thin chu pumpelh lo turin zirlaite a fuih a. Branch YMA thiltih chu chhawmnun zel tlak a nih thu leh veng bil mai ni lo ram tân pawha chhenfakawm a la nih ngei a beisei thu sawiin, rah tha tak a chhuah ngei theih nan duhsakna a hlan a ni. Ramthar Veng Branch YMA hian an vengchhung zirlai naupangte tan Aptitude Examination hi buatsaihin zirlai 300 chuangin exam hi an bei a. Vengchhung nu leh pate sum thawh tling khawm Rs 2,09,900/- atangin lawmman tha tak buatsaih a ni. Zirlaite hi an pawl san dan milin category 4 ah then an ni a. Question-te hi Optical Mark Recognition (OMR) hmanga chhan tura buatsaih niin, category tin tan a hran theuh siam a ni.
Lawmman pakhatna dawngtuin Category I ah Rs 5,000/-, Category II ah Rs 5,000/-, Category III ah Rs 8,000/- leh Category IV ah Rs 10,000/- te an dawng a. Heng bakah hian Category tina Top 10 in Trophy mawi tak an dawn vek bakah, 1-na atanga 5-na te’n Trophy bakah sum fai thahnem tak an dawng vek bawk a ni. Ramthar Veng Aptitude Challenge Examination (RACE) 2025 result puanna hunah hian School Education Minister hlui Pu H. Rohluna, Ramthar Veng Local Council member-te, NGO hruaitute, khawtlang mi pawimawhte, nu leh pate leh zirlaite an tel a ni.
