DoNER Ministry-a Joint Secretary (NEC) Pu Angshuman Dey chuan Lungsena oil palm chinna hmun a tlawh
Sawrkar laipui Ministry of Development of North Eastern Region (DoNER)-a Joint Secretary (NEC) Pu Angshuman Dey chuan vawiin khan Lunglei District chhung Lungsen khuaa oil palm chinna hmun (plantation) te a hmunah tlawhin, oil palm chingtute harsatna leh mamawh hrang hrang a enpui.
DoNER Joint Secretary (NEC) Pu Angshuman Dey hi Agriculture & Farmers Welfare Department Secretary Pi Ramdinliani, Joint Director Pu B. Ramnunsanga, Deputy Director (Oil Palm) Pu David Fangzauva leh Assistant DAO Lunglei Pu K. Lalrinfela te’n an ṭawiawm a. Lungsen BDO Pu Lalhruailiana Zote hovin Horticulture Department-a thawktute leh kut hna thawktute’n an lo dawngsawng a ni.
Joint Secretary (NEC) Pu Angshuman Dey hian oil palm chinna hmun a tlawhnaah hian oil palm chingtute dinhmun leh mamawh hrang hrang enpuiin, department hotute nen hlawk zawka oil palm thar chhuah a nih theih nana thil pawimawh hrang hrang leh hma lak dan turte an sawi ho va. Oil palm hralh chhuahna kawnga harsatna lian ber pakhat, a phurhna kawng (link road) mamawhna te a hmunah hmuhpuiin, an harsatna sut kianna tur project ngaihtuah a nih tur thu a sawi.
Kut hna thawktute nena inkawm hona hun buatsaihah Pu Angshuman Dey chuan Lunglei District chu oil palm chhinna tur ram nei ṭha district a nih angin awmze nei zawk leh tihtak zeta oil palm chin chu kalpui turin kut hna thawktute a chah a. An mamawh hrang hrangah inthlahrung lova department-a thawktute rawn ṭhin tura chahin, kut hna thawktute’n an harsatna leh mamawh hrang hrang a hnena an lo thlente chu a theih anga um zui a nih tur thu a sawi bawk.
