District hospital siaha-in nqas certification leh kayakalp lawmman an dawn lawmna nei
Vawiin khan District Medical Superintendent Hall-ah District Hospital Siaha in kum 2023-2024, 2024-2025 chhunga KAYAKALP intihsiaknaa lawmman pahnihna a dawn leh Eco Friendly 2024-2025-a pakhatna leh NQAS Certification a dawn lawmna hun hman a ni. Dr Teresa Thaidi in he hun hi a kaihruai a, Rev P. Riabi, DHS Chaplain-in hunserh hmangin Dr K. Beiparysa in kalkhawmte inlawmna thu a sawi. Pu S. Lalremthanga, Deputy Chief Executive Member, MADC chuan District Hospital Siaha-in lawmman thahnem tak a dawng leh hmuh theih khawpa hmasawnna a awm chu a chhuan thu sawiin, Ram leh hnam hmasawnna innghahna chu thianghlimna leh hriselnaah thui tak a innghat a ti. District hmasawnna thlentu an ni thei tih sawiin mahni hma zawn theuhah malsawmna thlentu kan nih chuan ram mipuite pawhin nuam an tithin a, a hlawkna teltu kan ni theuh thin a ni a ti. Thawktute inpeknaah lawmthu sawiin mipuite leh district tana thawk chhunzawmtu ni zel turin a sawm nghal bawk.
Deputy Chief Executive Member chuan chhungtinte chu damdawiinah lut tawh vek kan nih a rinawm a, thawktute hlim hmel chuan damlote leh a awmpuitute a tidam sawng sawng a, a thlamuanthlakin damdawi pek aiin mi an enkawl dan chuan mi a tidam chak zawk mahin a hriat a. Rilru lam a hlim a, a dam chuan taksa a hrisel thin a ti.Hmangaihna avanga tawngkam vin hman a ngaih chang pawhin tawngkam mawi zawk hmang hram hram tur a chah a, Ramri hrula awm kan nih avangin damlo leh a awmpuitute chu hnam hrang hrang, damdawiin dan leh dun hre lo tak tak an awm thei tih hriain zawldawh taka lo chhawn a, an lungdamna zana lo tanpui thin turin a ngen bawk. Dr C. Lalrosanga, District Medical Superintendent chuan KAYAKALP chu Damdawiin fai inelna 15th May, 2015 atanga India ram puma neih tan anih thu sawiin District Hospital Siaha erawh sak mek anih avangin 2018 atang chauhin a tel tan a, a tel kum hian most improved award a la nghal a, chumi atang chuan kum tin lawmman chi hrang hrang a dawng ziah a ni. Tun tuma lawmna hun hman hi kum 2023-2024, 2024-2025 niin, lawmman hi tum khatah semin hemi kum hian pahnihna ve ve a la a ni. He inelnaah hian tehfung hrang hrang hmangin tum eng emaw zat endikna neih hnuah hetiang lawmman hlu tak dawn a ni thei chu thawktute leh veng chhung mite inpekna leh thahnemngaihna anih avangin lawmthu a sawi bawk. DMS hian OPD Registration hi online-a kalpui anih tawh thu sawiin nakin lawkah chuan hospital pumpui hi digitalized tum anih thu a sawi bakah sawrkar atanga thawktu leh khawl tha tak tak an pek avangin sawrkar chungah lawmthu a sawi bawk.
Pi Abigail KT. Zaizai, District Quality Manager-in National Quality Assurance Standards-ah District Hospital Siaha chuan ni 23.11.2024 khan point 92.5 hmuin NQAS certified a ni a. NQAS hi hospital tehfung sang ber a ni a, certified ni tur chuan District, State leh National paltlang vek a ngai a. NQAS certify tura an tan nasat thu sawiin a tirah certificate hmuh kan tum a, a hnuah chuan mark 90% hmuh tumin kan tang bawk a, kan tum ang ngeiin 92.5% kan hmu thei hi thawktu zawng zawng thawhrimna leh taimakna vang a ni a ti bawk.
