DHOLAI, CACHAR-AH ASSAM LEH MIZORAM ‘BORDER FESTIVAL’ NEIH A NI DAWN
Cachar District Administration chuan November ni 24 khian Dholai-ah ‘Border Festival’ ropui tak a buatsaih dawn a. He hunah hian Assam leh Mizoram mipuite inkara inlaichinna tha zawk leh inzawmna thar siam a nih theih nan hnam zia rang entirna hun hman a ni anga, infiamna hrang hrang pawh neih tum a ni.Hemi chungchang ngaihtuah hian nimin khan CDC Dholai office-ah thutkhawmna neih a ni a. State pahnih atanga official kalkhawm te chuan he hun hlawhtling taka hman a nih theih nana inbuatsaihna hrang hrangte an thlirho.
He meeting-ah hian Mizoram aiawhin Pu H. Vanlalbiakzauva, SDO (Civil), Vairengte leh Pu Lalnufela Chawngthu, MCS, SDO (Sadar), Mamit te an tel a. Cachar lam atangin DDC Cachar, Pu Norsing Bey, ACS chuan meeting hi a kaihruai a, District administration pahnih te inkara inthlunzawmna tha a awm a tul thu a sawi.
Border Festival neih ni hian B.N.M.P. School field-ah Cachar leh Mizoram team ten friendly football match leh volleyball match an nei dawn a. Hemi rual hian CDC Dholai office ground-ah cultural programme hlimawm tak neih a ni anga, Vairengte leh Mamit atanga cultural troupe te leh Cachar artist te an perform ang. Cultural programme hi chawhma dar 11 atanga chawhnu dar 2 thleng neih tura ruahman a ni.Hemi ni hian ASRLM chuan food stall hrang hrang an siam dawn a, tualchhung eitur te chhawpchhuah a ni ang. Mizoram atangin SRLM lamin cultural & food stall an siam ve bawk ang.
