Dampa bialah party 5 in hming an pe lut
Dampa Bial MLA By-election neih tura chuh tumte tana hming pek luh hun chu vawiin tlai dar 3 khan khar a ni a, candidate 5 an awm ang. Dampa biala by election chuh turin vawiin khan PC Party Vice President Pu K. Zahmingthanga, Aizawl Sakawrtuichhun veng chuan Returning Officer Pu Malsawmzuala hnenah hming a pe lut a, Mizoram People’s Conference hmingin nomination hi a file a ni.
Dampa bial by-election ah hian Candidate-te inhnuhdawh theih hun hnuhnung atan October ni 24, 2025 ruat a ni a, Inthlan chuh tur hian BJP Candidate Pu Lalhmingthanga, INC candidate Pu John Rotluangliana, MNF candidate Dr R Lalthangliana leh ZPM candidate Pu Vanlalsailova-ten hming an thehlut tawh a; PC party chuan nimin khan an candidate atan Pu K. Zahmingthanga chu puangin vawiin khan a thehlut ve leh a, kil 5 atanga inbeihna a awm dawn a ni.
Dampa Bialah hian vote thlakna hmun (polling station) 1,276 a awm a, Dampa Bial chhungmi vote nei mipa 10,605 leh hmeichhia 10,185 bakah, sorkar hnathawk (service voter) mipa 111 leh hmeichhia 4 an awm a; vote nei zawng zawng hi an vaiin mi 20,905 niin, mipa 10,716 leh hmeichhia 10,189 an ni.
