Council of ministers thukhawm
Nizan khan Council of Ministers chu Chief Minister Pu Lalduhoma kaihhruaiin Chief Minister Office Cabinet room-ah an thukhawm a. Chakma Autonomous District Council chungchanga Mizoram Governor-in Council of Ministers thurawn (Advice) hriat a duh chungchang an sawiho.
Governor hian Chakma Autonomous District Council kal dan chhui chiangtu tur Inquiry Commission thar din tha an tih leh tih loh thuah Council of Ministers ngaihdan hriat a duh a. He mi thuah hian nizana Council of Ministers thukhawm hian, Chakma Autonomous District Council kalphung chhui chiangtu Inquiry Commission hi din a lo ni tawh a, an report pawh an thehlut tawh a. Chu mi hnuah Autonomous District Councils pathumte kalphung zirchiangtu Study Team, Chief Secretary kaihhruaina hnuaiah din a ni leh a, an report an thehlut tawh a. Lawngtlai Deputy Commissioner pawhin Chakma Autonomous District Council chungchang report a thehlut tawh bawk a. Heng report pathumte hi an tha tawk a. A hranpaa Inquiry Commission din tharleh hi a tul tawh lovah a ngai a ni.
Governor hian Chakma Autonomous District Council chu Governor’s Rule a dah chhunzawm zel tur chi a nih leh nih loh thuah Council of Ministers ngaihdan (Advice) hriat a duh bawk a. He mi thuah hian nizana Council of Ministers thukhawm chuan, Chakma Autonomous District Council-ah hian MDC member 20 a member 16 neia sorkarna siam thei Party an awm avang leh High Court-in sorkarna siamtir dan kawng zawng tura thurawn a lo pek tawh angin Governor’s Rule-a dah lova sorkarna siamtir turin ngenna a lo siam tawh a. Nimahsela Governor’s Rule-ah hian dah a ni ta thova. He Governor’s Rule term a zawh hnuah pawh hian sorkarna siam thei party te hian an dinhmun sawh sawn lova sorkarna an la siam theih reng avangin Governor’s Rule-a thla ruk dang dah leh a tulna chhan (political instability) engmah a awmin a hre lova. CADC ah hian sorkar ngelnghet tak a ding thei tih hi Council of Ministers ngaihdan a ni.
