COMMERCE & INDUSTRIES MINISTER HOVIN AIZAWL BAZARPUI A STALL AWM DAN DINHMUN ENHO A NI
Nimin chawhnu khan Commerce & Industries Department Minister Pu F. Rodingliana Office Chamber-ah Department thuneituten Aizawl Bazarpui ti a hriat, Aizawl City Centre leh Aizawl City Centre Annexe Building sak mek dinhmun ennawnin an thukhawm.He thutkhawmah hian Bazar building thiah hmaa seat nei, bazar building sak zawh a nih huna seat pek leh tura inremna a siam pui mi 1300 chuang te chungchang ngaihtuah a ni a. Heng mite chungchang hi endik leh vek tura tih niin Sawkar dan dinglai angin heng bazar seat-te hi midang kuta hlanchhawn emaw hralhchhawn khap tlat a ni tih tarlan a ni a. A tir a seat pek (original allotee) te ngeiin bazar seat hi an la luah em tih uluk taka endik nise tiin rel a ni. He endikna hi voters ID leh original document hrang hrangte hmanga uluk taka endik tur niin, allotment neitute pawh koh a anmahni finfiahna (interview) neih pui tur a nih thu sawi a ni.
Bazar building pahnih- Aizawl City Centre leh Aizawl City Centre Annexe Building sak mek ah hian tuna ruahman dan chuan dawr 1415 awm thei tura duan a ni a, Ministry hmasa khan bazar building sak zawh a nih huna seat pek leh tura inremna siam pui mi 1300 chuang an awm mek thu tarlan a ni.
Industries Minister Pu F.Rodingliana hova thutkhawmna ah hian Bazar seat changtu zinga hralh chhawng emaw inhlanchhawng man chhuah an awm a nih chuan an allotment cancel ni se tia rel a ni a. Dawr luahman ennawn bakah dawr luahtuten security deposit an dah a tul tur thu sawi a ni bawk.
