Chief Secretary-in Mumbai-ah Mizoram House sakna tur bawhzui
Chief Secretary Pu Khilli Ram Meena chuan ni 7-11, August, 2025 chhung khan Mumbai a tlawh a. Mumbai-a a cham chhung hian Mumbai Mizoram House tlawhin Mumbai Mizoram House-a thawktute nen an inkawmhona an nei a. Damlo enkawlna chungchang leh Mizoram House siam chungchang te an sawiho a ni. Chief Secretary hi Pu H. Lalruatliana, Dy. Resident Commissioner, Mumbai Mizoram House chuan a lo dawngsawng a.
Mizoram House a thleng damlo te hi Chief Secretary chuan an thlenna room-ah theuh a kan kual nghal bawk a ni. Chief Secretary chungah Mumbai Mizoram House a thawk te leh damlo te chuan Mizoram Chief Secretary in a rawn tlawh vawikhatna nia an hriat thu leh an thlamuan thu te an lo sawi. Mumbai a tlawhna kal zelah Pu Khilli Ram Meena chuan Maharashtra Chief Secretary of Maharashtra Shri Rajesh Kumar Meena chu a chenna inah kawmin, Navi Mumbai-ah Mizoram House siam tum chungchang a sawpui a. Maharashtra Chief Secretary chuan Managing Director, CIDCO pawh phone a be nghal in thil awm dan te a zawh chuan hnuah Mizoram sorkarin extension permission dilna a thehluh tawh chu a rang lama lo enzui turin a hrilh nghal a.
He hunah hian Pu Khilli Ram Meena pawhin TATA Memorial Hospital leh Mizo cancer vei te inkara thawhhona tha neih a pawimawh thu a sawi bawk. Hemi chungchangah hian. Maharashtra Chief Secretary chuan TATA memorial Hospital thuneitute hnenah a tul anga ruahmanna siam turin ngenna a siam dawn tih a sawi bawk a ni.
