Chief Minister Pu Lalduhoma’n Kolasib a Nursing school chu nursing college a hlan kai a ni dawn a ti
Pu Lalduhoma chuan tun hnai a Delhi a sorkar laipui thuneitu hrang hrang an dawrna-ah Kolasib a nursing school chu nursing college a hlankai an remti a. Hemi tihpuitlinna atan hian cheng vaibelchhe 7 dah a nih thu an lo hrilh niin a sawi. CM chuan village council te chan ve tur hun rei tak pek theih tawh loh pekna atan tunah hian cheng vaibelchhe 35 an rawn nawr chhuak niin a sawi a.
Finance commission-in VC-te chan tur atana sum a ruahman thin kha a tang rei deuh a. Kum 2023-24 chin chauh an la la a. A hma lama Utilisation Certificate pek loh khan a dal a, a hnu lamah chuan la sanction zui leh zel tur a ni. Chhim lama thlawhna tumhmun din tura hma lak a nih dan sawiin Pu Lalduhoma chuan Buildwell private limited Noida amite nen an inbiak thu a sawi a.
Anni hian a hmuna rawn enfiahin thlawhna tumhmun a siam theih dawn chuan anmahni senso in an rawn siam dawn a. An lo chhoh hunah inremnate siamin kalpui tum a nih thu a sawi bawk a ni. Hei bakah hian NBCC hovin an dawr thu CM chuan sawiin hmun engemawzatah tuikhuah tur an rawn en dawn niin a sawi a. A bik takin a biala Mat lui khuahna tur an rawn en dawn thu sawiin, tui in tur, kawlphetha siamna tur leh zinmite hipna leh sangha khawina atana ruahman tum a nih thu a sawi a. A ram leilungte drone hmanga endik tura lo chhoh thuai an tum thu an sawi tih a sawi a ni.
