Chief minister leh us consul general inkawm
Vawiin khan Chief Minister Pu Lalduhoma chuan a office-ah Mizoram tlawha lo zin mek Pi Kathy Giles Diaz, Consul General, US Consulate General, Kolkata chu a kawm a. Mizoram a rawn tlawh avanga lawmthu lo hrilhin hun nuam tak hmang turin duhsakna a hlan.
Pi Kathy Giles Diaz hian Mizoram chu mawi a tih thu leh rawn tlawh a chak thin thu a sawi a. US ah Mizo hnahthlak tam tak an awm a, an awmna hmunah khua leh tui tha an ni zel a. Chutianga inzawmna tha tak nei kan nih avang chuan rawn kal hi ka chak zual a ni, a ti. Mizoramah US company te tana Investment kalpui theihna chi a awm a nih chuan a tul anga tanpui a inhuam thu a sawi bawk.
Chief Minister hian, investment lama Mizoram tanpui a inhuamnaah lawmthu hrilhin Foreign Funding hmalakna lam chi reng reng chu Central sorkar remtihna hnuaia kalpui vek a nih thu a hrilh a. Mizo hnahthlak US a cheng an tam tawh a, chuvangin Mizoram mipuite zingah US tlawh duh an tam ve tial tial a. Inpawh taka kan thawhho a tul a ni, a ti. Chief Minister hi Pu Vanlaldina Fanai, Commissioner & Secretary to CM leh CM Officer dangten an tawiawm a ni.
