Chief minister in yma day neihlohah hmang
Vawiin khan Chief Minister Pu Lalduhoma chuan a bial chhung khua Neihloh Branch ten YMA day vawi 90 na an lawmna a hmanpui a, khawvel hmun hrang hranga awm YMA member zawng zawngte YMA Day chibai a buk. Chief Minister chuan, Neihloh chu khaw lian a ni lo va, mahse a chhunga cheng mipuite in inngeih avangin a nuam hle. A hmunhma hian duh thu a sam lo va, a him tawk lo va, a zauh hleih theih tawh bawk si lo va. In khaw ram chhungah hian khaw thar kai mai ula a thain ka ring. Sawrkar nena tangruala ngaihtuahna thar sen mai thain ka hria, tiin an khua sawn mai thaa a hriat thu a tarlang. YMA chu a din tirh phat atangin tanpui ngaite tanpuitu, zofate tana pawl tangkai leh zahawm a la ni reng a. A hlutna hi a hniam thei lo. Mi thenkhatten YMA ropuizia hi an la hmu fiah lo a nih chuan lungngaihna leh harsatna an tawh niah an la hmu ngei ang. An fel vang emaw an that vang emaw ni lovin Zofa an nihna vang ringawtin YMA hian a la tuamhlawm dawn a. An dam laia a tuamhlawm ta lo a nih pawhin an ruang tal chu zah takin thlanmualah a phum ngei ang.
Tun hnaiah ruahpui vangin chhiatna kan tuar nasa a, chhiatna thlenna apianga tanpuitu langsar ber chu YMA te an ni. An tanpuina dawngtu, a bikin hnam dangten nasa takin an lawmna thu social media lamah an rawn pho chhuak a. Mizo min tihmingtha em em a ni. Kan ram leh hnam din chhuahna tur chu thawhchhuah tam tak nei ram kan nih a, hnam dangte mamawh pe thei khawpa kan san hun a ni a. Chu dinhmun thleng tur chuan YMA member ten hmathlir fel tak neia hna kan thawh a ngai. Kan ram siamtha tur hian hnam dangte an rawn kal dawn lo va, kan tu leh fate rawn tih atana dah chi pawh a ni lo. Keini, tuna chhuan awm mek te hian thlentir i tum ang u, a ti. Chief Minister hian Thenzawl leh a chhehvel ram thuta Peace City din tuma hma a lak dan pawh a tarlang a. Master Plan kan siam thuai dawn a, a tak a chan hunah chuan in khawtlang hian in chhawr hle dawn a ni, a ti.
Neihloh Branch YMA Day lawmna hi Pu Lalbuatsaiha, Branch President in a kaihruai a, Pu Lalramtiama, Treasurer in hunserh a hmang a, member boralte sunna te neiin Pu Lalawmpuia, VCP leh Pu C. Lalhmingliana, Adviser ten thusawina an nei bawk. Neihloh Branch YMA ah hian member 262 an awm mek a, member thi pahnih an nei. Tun hnai ruahsur nasa vang khan Neihloh khua hian chhiatna a tuar nasa hle a. Khaw panna kawng rei tak a ping a, chenna in enge maw zat a chhia a, khaw tuilak a chhia a, tanky awmna a him lo va. YMA hall leh Library pawh leiminin a hnawh avangin YMA day pawh hi Primary School lamah an hman phah a ni.
